سێ کارمەندی نەتەوە یەکگرتووەکان لە پێکدادانەکانی سوودان کوژران

 

رۆژی یەکشەممە، 16ـی نیسانی 2023، ئاژانسەکەی نەتەوە یەکگرتووەکان لە راگەیەندراوێکدا گوتی سێ کارمەندیان لە رووبەڕووبوونەوەکانی نێوان سوپای سوودان و هێزەکانی پشتیوانیی خێرا لە شاری دارفووری رۆژهەڵاتی سوودان، کوژراون و دوو کارمەندی دیکەشیان برینداربوون.

 

ئاژانسەکە دەڵێ سێ کوژراوەکە هەموویان خەڵکی سوودانن.

 

سیندی مەککەین، سەرپەرشتیاری پرۆگرامی خۆراکی جیهانی لە سوودان، لە راگەیێندراوێکدا کارەکانی ئاژانسەکەی لەو وڵاتە هەڵپەسارد و گوتی "ناچارین بۆ ماوەیەکی کاتی هەموو چالاکییەکانمان لە سوودان رابگرین. بەوردی چاودێری دۆخی ئەمنیی وڵاتەکە دەکەین".

 

مەککەین گوتیشی، "ئەرکی ئێمە ئەوەیە یارمەتی ئەو سوودانییانە بدەین کە رووبەڕووی کەمیی خۆراک بوونەتەوە، بەڵام ناتوانین ئەو ئەرکە ئەنجامبدەین تاوەکو سەلامەتی کارمەندەکانمان پارێزراو نەبێت".

 

ڤۆڵکەر پێرس، نوێنەری تایبەتی سکرتێری گشتیی نەتەوە یەکگرتووەکان لە سوودان سەبارەت بەو رەوشەی لە سوودان دروست بووە، گوتی "لەڕادەبەدەر تووشی شۆک بووم کاتێک زانیم موشەک بە بارەگای نەتەوە یەکگرتووەکان و شوێنە مرۆییەکانی دیکە کەتووە"، هەروەها گوتی "بارەگای نەتەوە یەکگرتووەکان لە دارفوور، تاڵانکراوە".

 

بەرەبەیانیی ئەمڕۆ دووشەممە، یەکێتیی پزیشکانی سوودان لەبارەی ئاماری ئەو شەڕ و پێکدادانە تووندەی لە شەممەوە لەنێوان سوپای سەرەکیی سوودان و گرووپێکی دیکەی هەڵگەڕاوە بە ناوی هێزەکانی پشتیوانیی خێرا هەڵگیرسا و تائێستا بەردەوامە، رایگەیاند "تاوەکو ئێستا بەلایەنی کەمەوە 97 کەس کوژراون، ئەوە جگە لەو کەسانەی لە دەرەوەی نەخۆشخانەکان گیانیان لەدەستداوە".