لە سوێد ژمارەی برسییەکان لە زیادبووندایە؛ 'لە 13 ساڵدا هەرگیز ئەو ژمارە زۆرەم نەبینیوە'

 

 

کاڤیان فیردەوسی، دامەزرێنەری رێکخراوی خێرخوازیی ژیانی ئاوارەکان دەڵێت، "وەکو دەبینیت، خەڵکێکی زۆر بۆ نانی بەیانی دێنە ئێرە؛ لەم 13 ساڵەدا کە ئەم رێکخراوە بەڕێوەدەبەم، هەرگیز ئەو ژمارە زۆرەی خەڵک نەهاتوونەتە ئێرە."

 

سوێد یەکێکە لەو وڵاتانەی زۆرترین کاریگەریی شەڕی ئۆکراینای لەسەرە. خاچی سووری سوێد دەڵێت، نزیکەی 12%ی ئەو خێزانانەی لە یەک باوان پێکدێن، تووشی برسێتی بوونەتەوە.

 

بەپێی ئامارەکان، نزیکەی 14%ی سوێدییەکان هەژارن. ناوەندی ئاماری سوێدیش دەڵێت، نزیکەی 15%ی دیکە مەترسیی هەژارییان لەسەرە.

 

نرخی ئەو خۆراکانەی ماریانێ دەیانکڕیت، لە یەک ساڵدا 20% بەرزبوونەتەوە و گەیشتوونەتە بەرزترین ئاست لە 70 ساڵی رابردوودا.

 

ماریانێ ئۆربێرگ، خانەنشین دەڵێت، "نرخی هەموو شتێک بەرزبووەتەوە، خەڵک شێوازی خواردنیشیان گۆڕیوە و ئەم رۆژانە بە شێوەیەکی جیاواز نان دەخۆن تاوەکو بژێوییان پەیدا بکەن."

 

کۆمیسیۆنی ئەوروپا پێشبینی دەکات سوێد تاکە وڵاتی ئەوروپا بێت لە ئەمساڵدا تووشی سستیی ئابووری ببێتەوە، هەڵاوسانیش 12%یە و بەرزترین ئاستیەتی لە 32 ساڵی رابردوودا.

 

ئابووریناسان دەڵێن، ئێستا شەپۆلی هەڵاوسان لە نرخەکانی وزە دەرچووە و تەواوی ئابووریی وڵاتەکەی گرتووەتەوە.