هەزاران سەرئاژەڵ لە کازاخستان بەهۆی لافاوەوە مرداربوونەوە

 

وەزارەتی کشتوکاڵی کازاخستان رایگەیاند، هەشت هەزار و 100 سەر ئاژەڵ، لە نێویاندا شەش هەزار مەڕ و بزن، هەزار و 500 مانگا و  514 ئەسپ لە ناوچە جیاجیاکانی وڵاتەکە خنکاون. 

 

ناوچەی ئۆیلسکی یەکێکە لەوانەی کە زۆرترین زیانی بەرکەوتووە، بە جۆرێک کە 340 خانوو بەر لافاو کەوتوون و ژمارەیەکی زۆری ئاژەڵیش تێیدا مرداربوونەتەوە. 

 

حکومەتی کازاخستان بەڵێنی داوە ئاژەڵداران قەرەبوو بکاتەوە. 

 

وەزارەتی فریاگوزاریی وڵاتەکە باس لەوە دەکات، زیاتر لە سێ هەزار و 500 خانووی کازاخستان هێشتا لە ژێر لافاودان و زیاتر لە حەوت هەزار کەس گوێزراونەتەوە بۆ پەناگەی کاتی. 

 

چەند رۆژێکە توانەوەی بەفری زنجیرە چیاکانی ئورال لە هەرێمی سایبیریای رووسیا ئاستی ئاوی رووباری ئورالی بەرزکردووەتەوە و ئەوەش لافاوێکی گەورەی دروستکردووە.

 

ئاستی رووبارەکە 10 مەتر بەرزبووەتەوە و بەو هۆیەوە زیاتر لە 100 هەزار کەس لە رووسیا و کازاخستان ئاوارەبوون.

 

ئەوەی بووەتە هۆی توانەوەکەی بەفرەکە بریتییە لە بەرزبوونەوەی پلەی گەرما بۆ نزیکەی 20 پلەی سیلیزی لە بەرزاییەکانی سایبیریا. 

 

رووباری ئورال لە بەرزاییەکانی ئورالەوە لە رووسیا هەڵدەقوڵێت و بەنێو رووسیا و کازاخستاندا 2428 کیلۆمەتر دەبڕێت و دەرژێتە نێو دەریای خەزەرەوە.