رووسیا بە چڕی سەنتەری شاری خێرسۆن بۆردوومان دەکات؛ 'هیچ شوێنێک پارێزراو نییە'

 

هاووڵاتییەکی دانیشتووی شاری خێرسۆن دەڵێت، "سەرەتا دەنگی تەقینەوە لەنێو شار هات، دواتر لە نەخۆشخانەکەی دا، بۆیە ئێمە یەکسەر چەند ژن و منداڵێک کە لێرەبوون، گواستمانەوە بۆ شوێنێکی دیکە. هەموو شت وێران بوو، دواتر ئاگر دەستیپێکرد و  تەلەفۆنمان بۆ ئاگرکوژێنەوە کرد."

 

بۆردوومان بەردەوامە و هیچ کوێیەکی شارەکە پارێزراو نییە. مووشەکێک بەر ماڵی ژنێکی 83 ساڵ کەوتووە، بەڵام لەوکاتە ئەو لەماڵ نەبووە. هەر لە هەمان یەکەی نیشتەجێبوون 20 ماڵی دیکە بەهۆی بۆردوومانی رووسیاوە زیانیان پێگەیشتووە و خەڵک بە ترسەوە دەژین.

 

ئەو ژنە 83 ساڵە بە رووداوی گوت، "من و هاوژینەکەم سەرقاڵی ئامادەکردنی خواردن بووین بۆ سەگەکەمان، دوایی دەنگی زەنگی ئاگادارکردنەوەمان بیست و چووینە پەناگە. دواتر دراوسێکانمان تەلەفۆنیان کرد و گوتیان وەرنەوە ماڵەکەتان وێران بووە."

 

بەپێی ئاماری پارێزگاری خێرسۆن، لە ماوەی 24 کاژێردا، رووسیا 63 جار بە چەکی جیاواز هێرشی کردووەتەسەر شاری خێرسۆن و بەهۆیەوە کەسێک گیانی لەدەستداوە و پێنج کەسی دیکەیش بریندار بوون.

 

سەربازێكی ئۆکراینی لە شاری خێرسۆن بە رووداوی گوت، "ئێمە پێویستمان بە چەکی جیاوازی زیاترە بۆ ئەوەی کە پێگەی گەورەتری دووژمنەکانمان بپێکین و پاشەکشە بە وان بکەین تاوەکو نەتوانن لە خێرسۆن بدەن. ئێستا ئەوان لەو دیوی رووبارەکەی خێرسۆنن و لەوێوە هەموو جۆرە چەکێکی دوور و نزیک بۆ هێرشکردن بەکاردەهێنن." 

 

بەهۆی بەردەوامیی بۆردوومانەکانەوە کە دوو رۆژە بە چڕی دەستیپێکردووە، 80٪ـی خەڵک شارەکەیان چۆڵ کردووە.