لە سێ رۆژدا 28 کەس بەهۆی هێرشەکانی ئیسرائیل بۆ سەر غەزە گیانیان لەدەستداوە

 

لە 9ی ئەم مانگەوە، بزووتنەوەی جیهادی ئیسلامی لە فەلەستینەوە 550 رۆکێتیان ئاڕاستەی ئیسرائیل کردووە، لەوانە 440 رۆکێتیان گەیشتوونەتە ئاسمانی ئیسرائیل و 154 دانەشیان بە سیستمی بەرگریی ئاسمانی گومبەزی ئاسنین تێکشکێنراون. پێنج دانەشیان لە ناو غەزەدا کەوتوونەتە خوارەوە.

 

وەزارەتی بەرگریی ئیسرائیل باس لەوە دەکات، بەهۆی هێرشە مووشەکییەکانەوە لانیکەم کەسێک لە ئیسرائیل کوژراوە و پێنج کەسی دیکەش بریندار بوون. 

 

میسر هەوڵدەدات بۆ ئەوەی سوپای ئیسرائیل و جیهادی ئیسلامی رازی بکات بگەن بە ئاگربەست، هەریەک لە فەرەنسا، ئەڵمانیا و ئوردن داوای کۆتاییهێنان بە تووندوتیژییەکان دەکەن.

 

گرووپی چەکداری ئیسلامی جیهادی رایگەیاندووە، تائێستا 5 فەرماندەی هێزەکەیان کوژراون. بەرەی میللی رزگاریخوازی فەڵەستینیش رایگەیاندووە، 4 چەکداریان کوژراون.

 

یواڤ گاڵانت، وەزیری بەرگریی ئیسرائیل داوای لە سوپای وڵاتەکەی کردووە بۆ ئەوەی "لەوپەڕی ئامادەباشیدابن" و خۆیان بۆ ئەگەری زیادبووونی گرژییەکان ئامادەبکەن.

 

گرژییەکانی نێوان فەڵەستین و سوپای ئیسرائیل لەمساڵدا چەند جارێک هەڵکشانی بەرچاویان بەخۆوە بینیوە. لە سەرەتای ئەمساڵیشەوە 123 فەڵەستینی بەهۆی هێرش و بۆردومانەکانی ئیسرائیلەوە کوژراون و نزیکەی 15 ئیسرائیلیش لەلایەن بزووتنەوە چەکدارەکانی فەڵەستینییەوە کوژراون.

 

لە ساڵی 2022دا 204 فەڵەستینی و 29 ئیسرائیلی لە هێرشەکانی نێوان ئەو دوو هێزەدا کوژراون. ئەو ژمارەیە بەرزترینە لە دوای ساڵی 2004ـەوە کە تێیدا 803 فەڵەستینی و 940 ئیسرائیلی کوژران.