وەزارەتی دەرەوەی ئەمریکا: مارکۆ روبیۆ و مەسرور بارزانی جەختیان لە هاوبەشیی بەهێزی نێوان واشنتن و هەولێر کردەوە

 

رۆژی هەینی، 11-04-2025، تامی برووس، گوتەبێژی وەزارەتی دەرەوەی ئەمریکا رایگەیاند: "مارکۆ روبیۆ، وەزیری دەرەوەی ئەمریکا ئەمڕۆ بە تەلەفۆن قسەی لەگەڵ مەسرور بارزانی، سەرۆکوەزیرانی هەرێمی کوردستانی عێراق کرد. وەزیری دەرەوە جەختی لە هاوبەشیی بەهێزی نێوان ئەمریکا و هەرێمی کوردستانی عێراق کردەوە."

 

لە راگەیێندراوەکەی وەزارەتی دەرەوەی ئەمریکادا هاتووە، مارکۆ روبیۆ باسی هاوبەشیی نێوان هەردوولای لە "فراوانکردنی دەرفەتی بازرگانی، برەودان بە سەقامگیریی ناوچەیی و بەهێزکردنی دیموکراسی" کرد.

 

وەزارەتەکەی ئەمریکا دەڵێت، هەردوولا هاوڕابوون لەسەر ئەوەی "کردنەوەی دەستبەجێی بۆریی نەوتی عێراق-تورکیا بۆ پاراستنی وەبەرهێنانەکانی رابردووی ئەمریکییەکان و راکێشانی سەرنجی وەبەرهێنانی داهاتوو گرنگە."

 

لەبارەی ئەو پەیوەندییە تەلەفۆنییەوە، حکومەتی هەرێمی کوردستان بڵاویکردەوە: "سەرۆکی حکومەت و وەزیری دەرەوەی ئەمەریکا هاوڕابوون لەسەر پێویستیی و گرنگیی دەستپێکردنەوەی هەناردەکردنی نەوتی هەرێمی کوردستان لە رێگەی بەندەری جەیهانی تورکیاوە."

 

حکومەتی هەرێمی کوردستان هەروەها گوتی، وەزیری دەرەوەی ئەمەریکا سوپاس و پێزانینی وڵاتەکەی بۆ هەرێمی کوردستان دەربڕی کە بووەتە پەناگەیەکی ئارام بۆ پاراستنی گشت پێکهاتە نەتەوەیی و ئایینییەکان و رۆڵێکی گرنگیشی لە پاراستنی سەقامگیریی و ئاسایشی ناوچەکەدا هەیە.