ڤیدیۆ؛ بوومەلەرزە لە کرواتیا دەیان چاڵ لە زەویدا دروستدەکات

 

 

بوومەلەرزەکە رۆژی 3ی ئەم مانگە بە گوڕی 6.4 پلەی رێختەر لە دووریی 40 کیلۆمەتر لە باشووری رۆژئاوای شاری زاگرێبی پایتەختی ئەو وڵاتە روویدابوو، لە دەرەنجامی ئەوەش لە رۆژانی دواتردا نزیکەی 100 چاڵی چێوە بازنەیی دروستبوون کە تیرەی هەندێکیان لە 10 مەتر زیاترە و قووڵاییان دەگاتە 15 مەتر.

 

بەگوێرەی زانایانی جیۆلۆجی، هۆکاری دروستبوونی ئەو چاڵانە بۆ جۆری خاکەکە دەگەڕێتەوە کە بەردی کلسی و رێژەیەکی زۆری ئاوی ژێر زەویی تێدایە.

 

ئەمە جاری یەکەمە لە کرواتیا رۆچوونی زەوی بەم شێوەیە رووبدات و لە جیهانیشدا بە دیاردەیەکی دەگمەن دادەنرێت.

 

بەپێی زانیاریی ئاژانسە هەواڵییەکانی جیهان، بەهۆی بوومەلەرزەکەوە حەوت کەس گیانیان لەدەستداوە و زیانێکی زۆری ماددیش کەوتووەتەوە.