زیانی ئاگرەکەی لۆس ئەنجلس 135 ملیار دۆلاری تێپەڕاندووە

 

جۆ بایدن، سەرۆکی ئەمریکا لەبارەی ئاگرەکەوە گوتی، "ئاگرەکە دیمەنی جەنگی بیرخستمەوە کە چەند شوێنێکی دیاریکراو بۆردوومان کرابن. ئاگرەکە شێتانە تەشەنە دەکات و هەموو شتێک دەسووتێنێت."

 

ئاگر لە پێنج لاوە کەوتبووەوە، تاوەکو ئێستا یەکیان کۆنتڕۆڵکراوە و هەوڵەکانیش بۆ کۆنترۆڵکردنی چوار شوێنەکەی دیکە بەردەوامە.

 

جیم ماکدۆنێڵ، بەڕێوەبەری پۆلیسی لۆس ئەنجلس لەبارەی هەوڵەکانیان بۆ کوژاندنەوەی ئاگرەکان گوتی، "دەمەوێت خەڵک دڵنیابکەمەوە کە ماندوونەناسانە کاردەکەین بۆ ئەوەی ژیانی خەڵک و موڵکیان رزگار بکەین و پارێزگاری لە سەلامەتیی گشتی بکەین. لە سەرانسەری وڵاتەوە یارمەتیمان پێدەگات."

 

بەگوێرەی زانیارییە فەرمییەکان، لە 07-01-2025ـەوە کە ئاگرەکە کەوتووەتەوە، 150 کیلۆمەتر چوارگۆشە سووتاوە؛ 11 کەس گیانیان لەدەستداوە؛ زیان بەر 10 هەزار خانوو و باڵەخانە کەوتووە؛ 180 هەزار کەس ماڵەکانیان چۆڵکردووە. 

 

لەماوەی ئەو چوار رۆژە، 20 کەس لەسەر دزیکردن دەستگیرکراون و زیانە ئابوورییەکانیش تاوەکو ئێستا بە 135 بۆ 150 ملیار دۆلار مەزەندە دەکرێت.