ئۆکراینا: 20 درۆنی رووسیامان خستنە خوارەوە
رووداو دیجیتاڵ
ئۆکرانیا بەرەبەیانی ئەمڕۆ (یەکشەممە) رایگەیاند، هێزەکانی بەرگریی ئاسمانیی وڵاتەکە لە ماوەی شەوی رابردوودا، زیاتر لە 20 درۆنیان خستووەتە خوارەوە، کە ویستوویانە کیێڤ بکەنە ئامانج.
سێرگی پۆپکۆ، بەرپرسی ئیدارەی سەربازیی شاری کیێڤ لە تۆڕی کۆمەڵایەتیی تێلیگرام نووسیویەتی، درۆنەکان بە کۆمەڵ و لە ئاراستەی جیاوازەوە چوونەتە نێو پایتەختەکەوە.
ئەو بەرپرسە ئۆکراینییە ئاماژەی بەوەش کرد، هێزەکانی بەرگریی ئاسمانی ''توانییان زیاتر لە بیست درۆنی دوژمن لەنێوببەن،" دەشڵێت دواتر "ژمارەی وردی درۆنەکان لەلایەن هێزی ئاسمانیی ئۆکرانیاوە رادەگەیێنرێت."
دامودەزگاکانی کیێڤ داوایان لە خەڵک کردبوو لە پەناگەدا بمێننەوە، چونکە پاشماوەی سیستەمی بەرگریی ئاسمانی بەسەر پایتەختدا دەباری.
لە کیێڤ دەنگی نزیکەی 10 تەقینەوە بیستراوە
ڤیتالی کلیچکۆ، سەرۆکشارەوانیی شارۆچکەی پۆدیلسکی، رایگەیاند، پزیشکان چارەسەری کەسێکیان کردووە کە تووشی "گوشاری دەروونیی تووند" بووە، دوای ئەوەی پاشماوەکە لە ناوچەیەکی کراوەدا کەوتووەتە خوارەوە.
هەروەها پاشماوەی درۆن و مووشەکەکانی سیستمی بەرگری لە شارۆچکەکانی سڤیاتوشینسکی و شێڤچێنکیڤسکی کەوتوونەتە خوارەوە و بەپێی زانیارییەکانی پۆپکۆ، زیانیان بە باڵەخانەیەکی بەرز گەیاندووە.
پۆپکۆ لە تێلیگرام نووسیویەتی، زۆربەی پاشماوەکان لە شوێنێکی چۆڵ و بێ ئاوەدانیدا کەوتوون، هەرچەندە چەندین ئۆتۆمبێل، هێڵەکانی پاس و رێگە زیانیان بەرکەوتووە.