لە باکووری ئەفغانستان 50 کەس بەهۆی لافاوەوە گیانیان لەدەستدا

 

 

هیدایەتوڵڵا هەمدەرد، بەڕێوەبەری فەرمانگەی کارەساتە سرووشتییەکانی بەڵغان، ئاماژە بەوە دەکات، لافاوەکە لە چەندین ناوچە زیانیان بە ماڵ و سامانی خەڵک گەیاندووە.

 

هەمدەرد باسی لەوە کرد، ئەو ئامارەی لەبارەی زیانە گیانییەکان کۆیانکردووەتەوە، ئامارێکی سەرەتاییە و دەکرێت زیاتر بێت، چونکە "خەڵکێکی زۆر بێسەروشوێن بوون."

 

عەبدوڵڵا جەنان، گوتەبێژی وەزارەتی بەڕێوەبردنی کارەساتە سرووشتییەکانی ئەفغانستان رایگەیاند، لافاو کابوڵی پایتەختیشی گرتووەتەوە.

 

بە گوتەی ئەو بەرپرسە، تیمە فریاگوزارییەکان خواردن و یارمەتییەکانی دیکەیان گەیاندووەتە لێقەوماوان. جەنان باسی لەوەش کرد، هەموو هەوڵێکیان خستووەتە خزمەت رزگارکردنی خەڵک.

 

مانگی رابردووش لانیکەم 70 کەس لە ئەنجامی بارانی بەخوڕ و لافاوەوە لەو وڵاتە گیانیان لەدەستدا، نزیکەی 2000 ماڵ، سێ مزگەوت و چوار قوتابخانەش زیانیان بەرکەوت.

 

ئێستا هەزاران کەس لە ئەفغانستان دەربەدەرن. لافاو زیانی گەورەی بە کێڵگە کشتوکاڵییەکان گەیاندووە و مرداربوونەوەی 2500 سەر ئاژەڵی لێکەوتووەتەوە.