کۆشکی سپی: بایدن و نەتەنیاهوو 30 خولەک بە تەلەفۆن قسەیان کرد

 

شەوی چوارشەممە 09-10-2024 کارین ژان پیێر، سکرتێری رۆژنامەڤانیی کۆشکی سپی لەبارەی پەیوەندییە تەلەفۆنییەکەی بایدن و نەتەنیاهوو گوتی "سەرۆک جۆ بایدن راستەوخۆ 30 خولەک لەگەڵ بنیامین نەتەنیاهوو قسەی کرد و گفتوگۆکە بەرهەمداربوو."

 

نزیکەی دوو مانگ بوو بایدن و نەتەنیاهوو قسەیان لەگەڵ یەکدی نەکردبوو. ژان پیێر گوتی "لە پەیوەندییە تەلەفۆنییەکە باسی زۆر شتی گرنگ کرا." 

 

خانمە سکرتێرەکە باسی ئەو بابەتانەی نەکرد کە باسکراون؛ بەڵام گوتی، گفتوگۆ تەلەفۆنییەکە درێژکراوەی گفتوگۆکانی بەرپرسانی هەردوولا بوو لەسەر "وەڵامدانەوەی ئێران" کە بایدن پێشتر داوایکردبوو "دەبێت وەڵامەکە هاوتای هێرشەکە بێت."

 

کامالا هاریس، جێگری سەرۆکی ئەمریکا ئەمڕۆ لە نیویۆرک بوو، ئەویش بە ئۆنڵاین بەشداریی لە پەیوەندییەکە کردووە و راشیگەیاند: "گفتوگۆیەکی گرنگ بوو." کامالا هاریسیش لەسەر مژارەکانی ئەو پەیوەندییە هیچی نەدرکاند.