دەزگەی کاری یەکێتیی ئەوروپا: نزیکەی 200 هەزار هەلی کار لە هۆڵەندا بەبەتاڵی ماونەتەوە

 

لە بەرنامەی دیاسپۆرا کە شەوی هەینی 08-12-2023، هێمن عەبدوڵڵا پێشکێشی کرد، "هەواڵێکی خۆش"ـی بەو کەسانە گوت کە دەیانەوێت بۆ کارکردن سەردانی وڵاتی هۆڵەندا بکەن، گوتیشی، ئەو دەرفەتی کارانەی لەو وڵاتە هەن زۆرینەیان لە بوارەکانی ئایتی، ئەندازیاری، ئەلیکترۆنی، پەرستاری، پلاندانان و تاقیگەن.

 

یەکێتیی کاری ئەوروپا ئاماری دەرفەتی کاری لە هۆڵەندا بڵاوکردووەتەوە، بەگوێرەی ئامارەکە لەو وڵاتە نزیکەی 200 هەزار هەلی کار هەیە، ئاستی بێکاری بۆ 3.5% دابەزیوە، ئەو دابەزینەش بە "مێژووی" ناودەبات. 

 

تیمی دیاسپۆرا بەدواداچوونیان بۆ پرسی هەلی کار و پرۆسەی کارکردن لە هۆڵەندا کردووە، لەو وڵاتە سیستمێکی رێکوپێک هەیە بۆ رێکخستن و هێنانی دەستی کاری دەرەکی، سەرباری ئەوانەش کۆمەڵێک مەرجی قورسیشی داناوە بۆ ئەو کەسانەی لە دەرەوەی یەکێتیی ئەوروپا و ئەو وڵاتە دەیانەوێت ئەو کارانە وەربگرن. 

 

بەشێک لەو مەرجانەی حکومەتی هۆڵەندا دیاریکردووە، دەبێت زیاتر لە پێنج هەفتە بەسەر بڵاوکردنەوەی ئەو هەلی کارەدا تێپەڕی بێت، ئەگەر هیچ داواکارییەکی لەلایەن ئەو کەسانەی لە چوارچێوەی وڵاتانی یەکێتیی ئەوروپا یان وڵاتەکەدا دەژین، لەسەر نەبوو ئەوکات تاقیکردنەوەی ئاستی ئەکادیمی بۆ ئەو کەسە دەکرێت کە لەدەرەوە فۆڕمی پڕکردووەتەوە، لەگەڵ ئەوەشدا بەشێکیان مەرجی زانینی زمانی هۆڵەندی لەسەر دانراون.