لە بەرلین و رۆما خۆپێشاندانی پاڵپشتی بۆ خۆپێشاندانەکانی ئێران و رۆژهەڵاتی کوردستان بەڕێوەچوو

 

 

لە سەنتەری شاری بەرلین هاونیشتمانیانی دانیشتووی ئەڵمانیا و هاووڵاتییانی بە رەچەڵەک ئێرانی هاوسۆزی بۆ خۆپێشاندەرانی رۆژهەڵاتی کوردستان و ئێران دەردەبڕن؛ هاوکات داوای گۆڕانکاری لە سیاسەتی دەرەوەی ئەڵمانیا و یەکێتیی ئەوروپا بەرامبەر ئێران دەکەن.

 

نوێنەری خۆپێشاندانەکان لە بەرلین دەڵێت، "خاتوو بێربۆک پێویستە داوا لە باڵیۆزی ئەڵمانیا لە ئێران بکات بگەڕێتەوە ئەڵمانیا. خاتوو بێربۆک، پێویستە بە زووترین کات ئیبراهیم رەئیسی و تەواوی سوپای پاسداران بخرێنە نێو لیستی تیرۆری ئەڵمانیا و یەکێتیی ئەوروپاوە."

 

خۆپێشاندەران دەڵێن، لەم رێگەیەوە دەیانەوێت ئەو دۆخە پیشانی جیهان بدەن کە هاونیشتمانیان لە رۆژهەڵاتی کوردستان و خەڵکی ئێرانی تێکەوتووە.

 

وەکو خۆیان دەڵێن، دەیانەوێت بەو درووشم و پەیامە تووندانەی دەریدەبڕن، ببنە دەنگ و رەنگی ئەو کەسانەی لە نێوخۆی وڵاتەکەیان دووچاری تووندوتیژی دەبنەوە.

 

نوێنەری خۆپێشاندانەکان پێیوایە، "ژنانی ئێران بە ئازایەتی و ژیانی خۆیان مێژووی مافی مرۆڤی ئەم سەردەمە دەنووسنەوە."

 

لە رۆمای ئیتاڵیاش خۆپێشاندان کرا؛ خۆپێشاندەران بەدەم بەرزکردنەوە و گوتنەوەی درووشمەوە رێپێوانیان بەنێو شەقامەکاندا کرد و داواشیان لە حکومەتی وڵاتەکەیان کرد، لە مامەڵەی دەسەڵاتی ئێران بەرامبەر خەڵک بێدەنگ نەبێت.

 

بەگوێرەی ئامارە نافەرمییەکان، ژمارەی ئەو کەسانەی لە خۆپێشاندانەکان گیانیان لەدەستداوە 304 کەسن کە 41یان منداڵن و 24یشیان ژنن.