نەوجەوانێکی "پەڕگیر" لەلایەن پۆلیسی ئوسترالیاوە کوژرا
رووداو دیجیتاڵ
لە شاری پێرتی هەرێمی رۆژئاوای ئوسترالیا، دوای ئەوەی کوڕێکی تەمەن 16 ساڵ بە چەقۆ هێرشی کردە سەر خەڵک و کەسێکی بریندار کرد، پۆلیس تەقەی لێ کرد و نەوجەوانەکەی کوشت.
رۆجەر کووک، سەرۆکوەزیرانی هەرێمی رۆژئاوای ئوسترالیا لە کۆنگرەیەکی رۆژنامەڤانیدا باسی لەوە کرد، نەوجەوانەکە "پەڕگیر" بووە؛ دوای بریندارکردنی کەسێک بە چەقۆ، پەلاماری پۆلیسی داوە و ئەفسەرێک تەقەی لێکردووە و کوشتوویەتی.
کووک گوتیشی، "ئاماژەکان پێشانیدەدەن کوڕەکە لەسەر ئینتەرنێت بەو بیرە پەروەردە کرابێت. دەمەوێت دڵنەوایی بە کۆمەڵگە بدەم کە لەم قۆناخەدا وا دەردەکەوێت بە تاک و تەنیا ئەم کارەی کردبێت."
کۆڵ بلانچ، کۆمسیاری پۆلیسی هەرێمی رۆژئاوای ئوسترالیا بە رۆژنامەڤانانی گوت، درەنگانی شەویی شەممە، کەسێک لە رەگەزی نێر، پەیوەندیی بە پۆلیسەوە کردبوو و هۆشداریی دابوو "کاری تووندوتیژی" دەکات، بەڵام ناو و ناونیشانی خۆی نەگوتبوو.
چەند خوولەکێک دوای ئەوە، پەیوەندییەکی دیکەی تەلەفۆنی بە پۆلیسەوە کرابوو و ئاگادار کرابوونەوە کە "کەسێک لە رەگەزی نێر چەقۆیەکی بەدەستەوەیە و لە شوێنێکی وەستاندنی ئۆتۆمبێل دەسووڕێتەوە" لە گەڕەکی ویڵێتن لە باشووری شاری پێرت.
کۆمسیاری پۆلیسی شارەکە ئاماژە بەوە دەکات، لە کامێرای پۆلیسەوە دەردەکەوێت کە نەوجەوانەکە فەرمانەکانی پۆلیسی رەتکردووەتەوە و رازی نەبووە چەقۆکەی دابنێت.
پۆلیس دوو جار دەمانچەی کارەبایی لێدابوو، بەڵام "هەردوو جارەکە کاریگەریی پێویستی نەبوو. نەوجەوانەکە بەردەوام بوو لە نزیکبوونەوە لە ئەفسەری سێیەم کە دەمانچەی پێبوو و گوللـەیەکی تەقاند و نەوجەوانەکەی بریندار کرد."
دوای ماوەیەک، هەر ئەو شەوە، نەوجەوانەکە لە نەخۆشخانە گیانی لەدەستدا.