بڕیارێکی حکومەتی سریلانکا بەرهەمهێنەرانی چا نیگەران دەکات

 

حکومەتی سریلانکا بڕیاریداوە تەواوی بەرهەمە خۆراکییەکانی وڵاتەکە بکاتە ئەندامی، واتە بەکارهێنانی پەین و ماددە کیمیاییەکان کە بۆ زۆرکردنی بەرهەم و قەڵاچۆکردنی مێرووە زیانبەخشەکان بەکاردێن، چیدیکە رێگەی بەکارهێنانیان نەدا.

 

ئەو بڕیارە جووتیارانی نیگەران کردووە و دەڵێن، بەو شێوەیە پیشەسازی چا دەکەوێتە ژیر مەترسی و بۆ ئاستێکی زۆر کەم دادەبەزێت، هەروەها ئەو سێ ملیۆن کەسەش کە لەو کەرتە کار دەکەن، بە ئەگەری زۆرەوە کارەکانیان لەدەستدەدەن. 

 

‌هێرمان گواندراتنێ، بازرگانی چایە و دەڵێت، "ناتوانم پشتگیری لەو دیدگەیە بکەم کە بەرهەمی ئەندامی کوالێتیی چا باش دەکات، ئەگەر بە تەواوی بە شێوەی ئەندامی بەرهەمبێت، ئێمە 50٪ـی بەرهەممان کەمدەبێتەوە، بەڵام نرخی 50٪ بەرزنابێتەوە. شتێکی دیکەش هەیە، لە جیهاندا بازاڕێکی سنووردار بۆ چای ئەندامی هەیە."

 

سریلانکا خاوەن چای جۆری سەیلانە کە لە نیوەی یەکەمی ئەمساڵدا 160 ملیۆن کیلۆی لێ بەرهەمهاتووە. هەروەها خاوەنی جۆرە چایەکە بەناوی "چای سپی" کە کیلۆی بە دوو هەزار دۆلار دەفرۆشرێت.

 

جووتیارانی سریلانکا دەڵێن، بەرهەمهێنانی چای ئۆرگانیک 10 هێندە تێچووی زیاترە لەو بەرهەمەی کە ئێستا بەرهەمی دەهێنن و ئەگەر پلانەکەی حکومەت جێبەجێبکرێت ئەوا کۆتایی بە سەروەریی چای سەیلان لە بازاڕەکانی جیهاندا دێت.

 

ساناس گورونادا، بەڕێوەبەری گرووپی کۆمپانیاکانی RTS بۆ بەرهەمهێنانی چا دەڵێت، "ئەگەر پەینی کیمیایی بەکارنەهێنین، بەرهەمەکە بۆ چارەکی ئەوەی ئێستا هەمانە کەمدەبێتەوە."

 

بەگوێرەی ئاماری نەتەوە یەکگرتووەکان، سریلانکا 85٪ـی پێویستی بازاڕەکانی جیهان بۆ چای سەیلان پڕدەکاتەوە. کڕیاری سەرەکیی چای سریلانکیش عێراق، تورکیا، رووسیا و ئێرانن.

 

لە شەش مانگی یەکەمی ساڵی 2020، عێراق بە تەنیا 16.2 ملیۆن کیلۆگرام چای لە سریلانکا کڕیوە، دوای عێراق، تورکیا بە کڕینی 15.7 ملیۆن کیلۆگرام لە ریزبەندیی دووەم و رووسیا بە 14.4 کیلۆگرام و ئێرانیش بە 8.9 ملیۆن کیلۆگرام ریزبەندی سێیەم و چوارەمیان لە کڕینی چای سریلانکا گرتبوو.