گەورەشارەوانیی ئامەد بۆ لایەنگرانی ئامەدسپۆر: فیشەکی رووناککەرەوە بەکارنەهێنن

 

 

یارییەکە کاژێر 15:00 لە یاریگەی ئامەدسپۆر لە شاری ئامەد دەستپێدەکات. بردنەوەی یارییەکە بۆ ئامەدسپۆر زۆر گرنگە، لە بوونی بە پاڵەوانی کۆمەڵەی سووری خولی پلە دووی تۆپی پێی تورکیا نزیکی دەکاتەوە.

 

ماوەی چەند رۆژێکە ئامادەکارییەکان بۆ یارییەکە بەردەوامە و سەرۆکی یانەی ئامەدسپۆر دەڵێت، نزیکەی یەک ملیۆن کەس لە دەرەوەی ئامەد بۆ یارییەکە دێنە شارەکە، بەڵام تەنیا نزیکەی 35 هەزار کەس دەتوانن لە یاریگاکەدا سەیری یارییەکە بکەن.

 

گەورەشارەوانیی ئامەد لە چەند شوێنێکی شارەکەدا شاشەی گەورەی داناوە بۆ ئەوەی لایەنگرانی ئامەدسپۆر بتوانن سەیری یارییەکە بکەن. پێش یارییەکەش لە هەژماری سۆشیال میدیای خۆی بڵاوی کردووەتەوە، کە فیشەکی رووناککەرەوە بەکارنەهێنن، بەبێ گوێدانە دەرئەنجامی یارییەکە رێز لە ژیانی هەموو زیندەوەران بگرن.

 

ئامەدسپۆر بە کۆکردنەوەی 77 خاڵ لە کۆمەڵەی سووری خولی دووەمی یەکێتیی تۆپی پێی تورکیا  لە پلەی یەکەمدایە بە جیاوازی شەش خاڵ لە پێش وانسپۆرە، لە پلەی دووەمدایە.

 

بێجگە لە یارییەکەی ئەمڕۆ، ئامەدسپۆر دوو یاری دیکەی ماوە، ئەگەر ئەمڕۆ سەرکەوتن بەدەستبهێنێت، زیاتر لە بەدەستهێنانی نازناوەکە نزیک دەبێتەوە.

 

ئامەدسپۆر یانەیەکی تۆپی پێی باکووری کوردستانە و زۆربەی یاریزانەکانیان کوردن. چەندین جار لە پارێزگاکانی تورکیا رووبەڕووی هێرشی نەژادپەرستی بووەتەوە.