راهێنەری یانەی ئیستقلالی تاران لە قەدەخەکردنی وێنەی وریا غەفووری هاتە دەنگ

 

فەرهاد مەجیدی، راهێنەری یانەی ئیستقلالی تاران، رۆژی هەینی 20-05-2022 دوای تەواوبوونی یاریی یانەکەی لەگەڵ یانەی ئەراک، ئامادەنەبوو وەڵامی پرسیاری رۆژنامەڤانی میدیای فەرمیی ئێران بداتەوە و گوتی، دەبێ روونی بکەنەوە بە چ مافێک وێنەی کاپتنی یانەکەی لە میدیای ئەو وڵاتە بڵاو ناکرێتەوە.

 

فەرهاد مەجیدی دەڵێت، وەڵامی میدیای ئێران ناداتەوە تاوەکو کۆتایی بەو کارە نەهێنن.

 

لە تۆڕە کۆمەڵایەتییەکاندا ژمارەیەکی زۆر لە یاریزان و کەسانی ناسراو و خەڵکی ئاسایی دژی قەدەخەکردنی بڵاوکردنەوەی وێنە و ڤیدیۆی وریا غەفووری لە میدیای ئێران هەڵوێستیان هەبووە و هاشتاگێک بەناوی "وریا تەنیا نییە" رێکخراوە و پشتگیری لەو یاریزانە کوردە دەکەن.

 

شەوی دووشەممە لە کەناڵی سێی ئێران بەرنامەیەکی وەرزشی لەبارەی بەدەستهێنانی ناسناوی پاڵەوانێتیی خولە نایابەکانی ئێران لەلایەن ئیستقلالی تارانەوە بڵاوکرایەوە و وێنەی یاریزانەکانی ئەو یانەیە لەکاتی قسەکردنی میوانەکان لەسەر شاشەکانی ستۆدیۆ پیشاندرا، بەڵام وێنەی وریا غەفووری، کاپتنی یانەکەی تێدا نەبوو. 

 

دوای ئەوە بڵاوکرایەوە کە بڵاوکردنەوەی وێنە و ڤیدیۆی وریا غەفوری لە میدیای فەرمیی ئێراندا قەدەخەکراوە، ئەوەش بەهۆی هەڵوێستەکانی لە پشتگیریکردن لە خەڵکی ناڕازیی ئێران.