مەگری مەگری دایێ مەگری

 

لە شەوی نەورۆزی ئەم ساڵ، لە ئاهەنگێکی تایبەتی گاڵای رووداو، چەند کاژێرێک گوێمان لە شڤان پەروەر و ناسڕی رەزازیی و چەندان هونەرمەندی دیکەی هەر چوارپارچەی کوردستان گرت. شڤان پەروەر بە سازەکەی دەستی و چڕینی سترانی (من بیریا تە کریە) تەزووی بە جەستەی هەمووماندا هێنا.

 

رۆژی دواتر، بە گۆرانیی (شیرین بەهارە)ی تایەر تۆفیق، لە کەشێکی ساردی باراناوی رۆژی نەورۆز، ئامەد هەمووی هاتبووە سەرپێ. گەورە و بچووک، ژن و پیاو، خورت و کال، ماڵیان جێهێشتبوو و چووبوونە یادکردنەوەی جەژنی نەورۆز.

 

لە باکووری کوردستان، هەر وا بە سانایی، نەورۆز نەگەیشتووەتە ئەو بەشدارییە ملیۆنیانەی لە شاشەکانەوە دەیانبینین، بەڵکو ئەو خەباتە لە زەکییە ئاڵقانەوە دەستی پێکرد، ئەو ئافرەتەی ساڵی 1990 لەسەر شوورای ئامەد گڕی لە خۆی بەردا و بە ئاگری جەستەی نەورۆزی باکووری پیرۆزکرد. ئەو گڕەی وایکرد تائێستاش کڵپەی ئاگری نەورۆز لە ئامەد نەکوژێتەوە.

 

نەورۆزی ئەم ساڵی ئامەد، بە هەموو لایەکییەوە دیار بوو نەورۆزێکی جیاواز دەبێت. رێژەی زۆری بەشداربووان و گوتارە ئاشتیخوازییەکەی لەیلا زانا و میوانە بیانی و ناوخۆییەکان، کەشە ساردکەی ئامەدیان گەرم کردبوو.

 

لەدوای نەورۆز، لەیلا زانا ناوچە بە ناوچەی ئامەد و شار بە شاری باکوور دەگەڕێت و پاڵپشتی بەربژێرانی پارتەکەی دەکات. لە رۆژی یەکەمی بانگەشەکردنیشیدا لە دوای نەورۆز، لە ئامەدەوە گوتی: "ئیستەنبووڵ ببە بناخەی برایەتی نێوان کوردستان و تورکیا". بەر لە بانگەشەی هەڵبژاردنیش گوتبووی: "ئیدی کاتی ئەوە هاتووە ئەردۆغان پێڤاژووی ئاشتی لەناو دۆڵابی ساردکەرەوە دەربهێنیت".

 

 

بڕیارە رۆژی چوارشەممە، 27-03-2024، رەجەب تەیب ئەردۆغان سەردانی ئامەد بکات و لەوێ میتینگێکی جەماوەری فراوان ساز بکات. ئەردۆغان بۆ ئەوە ناچێتە ئامەد تاوەکو لەو شارە دەنگ بۆ پارتەکەی بێنێت، بەڵکو دەیەوێت لەوێوە دەنگ بۆ موراد کوڕومی بەربژێری پارتەکەی بۆ سەرۆکاییەتی شارەوانی ئیستەنبووڵ کۆبکاتەوە. ئەردۆغان دەیەوێت، لە شوورای ئامەدەوە، جارێکی دیکە فەتحی ئیستەنبووڵ بکات.

 

هاتنی ئەردۆغان، دەشێ بۆ پرسی کورد، پەیام و ئاماژەی تازەشی تێدابێت. چونکە گوتارەکەی لەیلا زانا، بۆن و بەرامەی رێککەوتن و سەردەمێکی نوێی سیاسیان لێوە دەهات. ئاخر زانا ئەگەر شتێک نەزانێت و رووناکییەکی لێوە دیار نەبێت، دوای هەشت ساڵ رووی دەمی لە ئەردۆغان ناکات و دەست بە بانگەشەی هەڵبژاردن ناکات بۆ پارتەکەی.

 

بڕیارە میتینگەکەی ئامەدی ئەردۆغان، لە مەیدانی (ئیستاسیۆن) بەڕێوەبچێت. رێک ئەو شوێنەی ساڵی 2005 ئەردۆغان وەکوو سەرۆکوەزیران چووە ئامەد و لەوێ گوتی: "پرسی کورد، پرسی منە" و لەوێوە دەرگای دانوستاندن لەگەڵ لایەنی کوردی کرایەوە و 10 ساڵ پێڤاژووی ئاشتی لە تورکیا بە دوو لایەن کاری بۆ کرا و دواتر بە بڕیارێکی تاکلایەنە، خرایە ناو دۆڵابی ساردکەرەوە.

 

ئێستا هەموو لایەک خوازیاری ئەوەن، بە دایکە جەرگسووتاوەکان بڵێن (مەگری مەگری). ئەو گۆرانییەی شڤان پەروەر و ئیبراهیم تاتلیسێس لە سەردانەکەی بارزانی و ئەردۆغان بۆ ئامەد لە پێناو ئاشتی گوتیانەوە. ئەو رۆژەی ئەردۆغان بە فەرمی ناوی کوردستانی هێنا و دانی پێدانا. ئەو رۆژەی عوسمان بایدەمیر و ئەردۆغان دەست لەناو دەست، لەسەرۆکایەتیی شارەوانیی ئامەد قسەی خۆشیان کرد. ئەو رۆژەی شاندی باشوور و باکوور گوتیان: "ئێمە برای یەکدین و ئامەد و هەولێر ماڵی هەموومانە".