سەختیی رێگەی گەیشتن بە لووتکەچیای ئاگری دەرفەتی کاری بۆ گوندنشینان دروستکردووە

 

لە بناری چیای ئاگریی باکووری کوردستان، کەلوپەلی گەشتیاران باردەکرێت، خاوەن ئەسپەکان گوندنشینانی پارێزگاکانی ئاگری و ئیدری باکووری کوردستانن، کە خۆیشیان سواری ئەسپەکان دەبن و بەرەو لووتکەی چیاکە بەڕێدەکەون.

 

نوروڵڵا چیڤاس، خاوەن ئەسپە و دەڵێ "لێرە ئەم کارە دەکەین. هاوکاریی گەشتیاران دەکەین لە سەرکەوتنیان بۆ سەر شاخ. خواردنیشیان بۆ ئامادە دەکەین. گەشتیاری نێوخۆییش هەن، بەڵام زۆربەیان بیانین".

 

بۆ جارێک چوونە سەر چیا و گەڕانەوە بەو  ئەسپانە، نرخ لەنێوان 120 بۆ 150 دۆلارە.

 

محەممەد تاشدەمیر، خاوەن ئەسپێکی دیکەیە و دەڵێ "ئەمساڵ کەمێک قەرەباڵخترە. یەکەمجار ماندووبوونی تێدایە، بەڵام دوای ماوەیەک راهاتین. ئەگەر ئێمە نەبین، کێ ئەو هەموو کەلوپەلە هەڵدەگرێت؟ ئەی وا نییە!"

 

چیای ئاگری بەرزییەکەی 5 هەزار و 137 مەترە لە ئاستی رووی دەریاوە.

 

گەشتیاران رۆژی یەکەم 3 هەزار و 200 مەتر سەردەکەون؛ رۆژی دووەم دەگەنە بەرزایی 4 هەزار و 200 مەتر؛ سێیەم رۆژ دەگەنە لووتکەی هەرە بەرزی چیاکە و دەمێننەوە.