لە ئیستەنبووڵ هێرشکرایە سەر دووکانێکی مەیفرۆشتن و دوو کەس کوژران

 

رووداوەکە کاژێر 00:15 خولەکی بەرەبەیانیی ئەمڕۆ یەکشەممە لە دووکانێکی مەیفرۆشتن لە شەقامی محەممەد عاکیف ئەرسۆی لە ناوچەی ئەسەنیوت ـی ئیستەنبووڵ روویدا. پێشنیوەڕۆی ئەمڕۆ پۆلیسی ئیستەنبووڵ یەکێك لە هێرشکارەکانی دەستبەسەر کرد و هەوڵەکان بۆ دەستبەسەرکردنی سێ هێرشکارەکەی دیکە بەردەوامن. 

 

بەگوێرەی زانیارییەکانی پۆلیس، چوار کەس بە ناوەکانی "م. ئـ"، "ئا. ئـ"، "ت. ئـ" و "س. ئـ" هێرشیان کردووەتە سەر دووکانەکە کە سێ کەسی تێدا بووە. 

 

بەپێی تۆمارەکانی کامێرای چاودێریی نێو دووکانەکە، ئەو چوار کەسە سەرەتا لەگەڵ دووکاندارەکە دەبێتە دەمەقاڵەیان و هێرشی دەکەنە سەر و دواتر دەمانچە رادەکێشن و تەقە دەکەن. 

 

لە هێرشەکەدا باتوهان بایندر ـی تەمەن 20 ساڵ و یونس ئەمرە ئەرزن ـی تەمەن 24 ساڵ گیانیان لەدەستدا و یوسف ئەرزن ـی تەمەن 21 ساڵ بریندار بوو. 

 

دوای هێرشەکە، چوار تۆمەتبارەکە بە ئۆتۆمبێلەکەی خۆیان هەڵاتوون. 

 

یەکێک لە تۆمەتبارەکان دوای ئەوەی دەستبەسەرکرا و لە بەڕێوەبەرایەتیی پۆلیسی ئەسەنیورت لێپرسینەوەی لەگەڵدا کرا، گواسترایەوە بۆ دادگە. 

 

سێ تۆمەتبارەکەی دیکە هێشتا دەستبەسەر نەکراون و تیمەکان بەردەوامن لە هەوڵەکانیان بۆ دەستبەسەرکردنیان.