لە ئیزمیر بەهۆی تەقینی غازەوە چوار کەس گیانیان لەدەستدا و 15ـی دیکە بریندار بوون

 

کاژێر 15:34 خولەکی ئەمڕۆ یەکشەممە، 30ـی حوزەیرانی 2024، سیستمی غازی باڵەخانەیەک لە گەڕەکی ئایرانجیلار سەر بە شارۆچکەی تۆرباڵی لە ئیزمیر تەقییەوە. بەپێی زانیارییە سەرەتاییەکان، چوار کەس گیانیان لەدەستدا و 15 کەسی دیکەش برینداربوون.  

 

تەقینەوەکە لە نهۆمی زەمینی باڵەخانە چوار نهۆمییەکە روویدا، کە کارگەیەکی بچووکی شیرنەمەنی و هەویرکاری بووە و بەهۆی دزەکردنی غازەوە تەقینەوەکە روویدا. 

 

بەهۆی کاریگەریی بەهێزیی تەقینەکە، کارگەکە بەتەواوەتی رووخا و زیانی زۆر بە باڵەخانەکە و دووکانەکان و ئۆتۆمبێلەکانی دەوروبەری کەوت. 

 

هەر بەپێی زانیارییەکان، شەش لە بریندارەکان دۆخی تەندروستییان ناجێگیرە و زۆربەی بریندارەکانیش بەهۆی پارچە جامە شکاوەکان بووە و سەرجەمیان رەوانەی نەخۆشخانە کراون.