وەزارەتی ناوخۆی تورکیا: 32 داعشمان دەستگیرکرد کە بەنیاز بوون هێرش بکەنە سەر باڵیۆزخانەی عێراق

 

میدیای فەرمیی تورکیا بە پشتبەستن بەو زانیارییانەی لە سەرچاوە ئەمنییەکانەوە دەستیان کەوتوون، رایگەیاند، ئۆپەراسیۆنەکە بەرەبەیانی ئەمڕۆ هەینی، 29ـی کانوونی یەکەمی 2023، کراوە و میت پشتڕاستی کردووەتەوە کە 'مجبەل ئەلشوەیحی' ناسراو بە 'ئەبو یەقین ئەلعێراقی'، بەرپرسی هەواڵگریی داعش لە تورکیا و محەممەد خیلاف ئیبراهیم ناسراو بە 'ئەبو لەیس' دەیانویست هێرش بکەنە سەر ژمارەیەک پەرستگەی ئایینە جیاوازەکان، هەروەها عەبدوڵڵا ئەلجومەیلی ناسراو بە 'ئەیهەب عەلانی' دەیویست هێرش بکاتە سەر باڵیۆزخانەی عێراق لە ئەنقەرە. 

 

بەگوێرەی زانیارییەکان ئەو سێ بەرپرسەی داعش و 29 ئەندامی دیکەی ئەو رێکخراوە لە ئەنجامی ئۆپەراسیۆنەکەدا دەستگیرکراون. 

 

لە چوارچێوەی ئۆپەراسیۆنەکەدا دەست بەسەر بڕێکی زۆر کەلوپەلی دیجیتاڵی تۆمەتبارەکاندا گیراوە.

 

پێشتر، هێزە ئەمنییەکانی تورکیا لە ئۆپەراسیۆنێکدا کە لە پارێزگای یۆزگات بەڕێوەچوو، پێنج هاووڵاتیی عێراقییان بە تۆمەتی ئەندامیێتی داعش دەستگیرکرد. 

 

ئۆپەراسیۆنەکە رۆژی پێنجشەممە، 28ـی کانوونی یەکەمی 2023، لەسەر راسپاردەی داواکاری گشتیی یۆزگات دەستیپێکرد، دوای ئەوەی بە تۆمەتی ئەندامیێتیی داعش فەرمانی گرتنی بۆ پێنج هاووڵاتیی عێراقی دەرکرد. 

 

لە چوارچێوەی ئۆپەراسیۆنەکەدا، تیمەکانی سەربە فەرماندەیی جەندرمەی پارێزگا، هەڵیانکوتایە سەر چەندین ناونیشان و پێنج کەسە داواکراوەکەیان دەستگیرکرد.