لە کۆنیا بوومەلەرزەیەک بە گوڕی 4.8 پلەی رێختەر روویدا

 

سەرۆکایەتیی کارەساتی لەناکاو و فریاگوزاریی تورکیا (ئافاد) بڵاویکردەوە، کاژێر 07:58 خولەکی ئەمڕۆ (سێشەممە 29ـی ئابی2023) بوومەلەرزەیەک بە گوڕی 4.8 پلەی رێختەر بە دووری 16 کیلۆمەتر لە شارۆچكەی کولو لە کۆنیا لە قووڵایی 13 کیلۆمەتر تۆمارکراوە.

 

بوومەلەرزەکە لە ئەنقەرە، کرشەهیر، کرککالە، یۆزگات و پارێزگاکانی دەوروبەری کۆنیا هەستیپیکراوە، بەڵام تائێستا هیچ روونکردنەوەیەک لەبارەی زیانەکانی بڵاونەکراوەتەوە.

 

دوای بوومەلەرزە وێرانکەرەکانی مەرەش لە شەشی شوباتی 2023 کە لە 11 پارێزگای باکووری کوردستان و تورکیا بووە هۆی گیانلەدەستدانی 50 هەزار و 500 کەس، پاشلەرزەکان بەردەوامن.

 

تائێستا زیاتر لە 10 هەزار پاشلەرزە تۆمارکراون کە گەورەترینیان بە گوڕی 6.4 پلەی رێختەر لە پارێزگای هاتای تۆمارکرا.

 

بوومەلەرزەکانی شوباتی رابردوو بوونە هۆی گیانلەدەستدانی نزیکەی 6 هەزار کەسیش لە رۆژئاوای کوردستان و سووریا.