لە باکووری کوردستان و تورکیا 147 کەس بە تۆمەتی بوونی پەیوەندی بە پەکەکە دەستبەسەر کران

 

 

عەلی یەرلیکایا، وەزیری ناوخۆی تورکیا رۆژی یەکشەممە 28ی نیسانی 2024 لە هەژماری تایبەتی خۆی لە تۆڕی کۆمەڵایەتیی ئێکس رایگەیاند، ئۆپەراسیۆنەکانی "بۆزدۆغان-30" لە 29 شار بە سەرپەرشتی سەرۆکی داواکاری گشتی کۆمار، فەرماندەیی گشتیی جەندرمە و بەڕێوەبەرایەتی گشتی ئاسایش کراون.

 

ئۆپەراسیۆنەکە لە پارێزگاکانی ئامەد، رووها، سەمسوور، ئاگری، ئەرزەڕۆم، دیلۆک، سێرت، شرنەخ، وان، کیلیس، خارپێت، مێردین و سێوازی باکووری کوردستان و ئیستەنبووڵ، مێرسین، ئەنقەرە، ئەنتاڵیا، ئایدین، دەنیزلی، ئیزمیر، مانیسا، تەکیرداغ، ریزە، عوسمانییە، کۆجائەلی، هاتای، گیرەسون، ئەدیرنە و بوردوری تورکیا بەڕێوەچوو، هێزە ئەمنییەکان هەڵیانکوتایە سەر چەندین ماڵ و ناونیشان.

 

یەرلیکایا دەڵێت، لە ئۆپەراسیۆنەکانی ئیستەنبووڵ، ئەنقەرە و رووها ژمارەیەک کەس کە بەشێک بوون لە راگەیاندنی پەکەکە و بڵاوکردنەوەی بانگەشەی رێکخراوەکەیان بە هاوبەشکردنی سۆشیال میدیا و دروستکردنی هەواڵ، هەروەها هەندێکیان بەشدارییان لە بۆنەی نەورۆزدا کردبوو بە تۆمەتی "بانگەشەکردن بۆ پەکەکە" دەستبەسەر کراون.

 

لە باکووری کوردستان و تورکیا رۆژانە هێزە ئەمنییەکان هەڵدەکوتنە سەر ماڵان و بە تۆمەتی پەکەکە، خەڵکی مەدەنی و چالاکڤانان و سیاسەتڤانانی کورد دەستگیر دەکەن.