هەدەپە دوو هاوسەرۆکی نوێی هەڵبژارد

 

پارتی دیموکراتی گەلان (هەدەپە) کاژێر 10:00ـی ئەمڕۆ یەکشەممە 27ـی ئابی 2023 چوارەمین کۆنگرەی نائاسایی خۆی لە ناوەندی بازرگانیی جیهانی لە ئەنقەرە سازدا. 

 

هەدەپە بە بەشداری 904 ئەندام و یەک لیست چووە کۆنگرەوە و لە شوێنی پەروین بوڵدان و میتحەت سانجار دوو هاوسەرۆکی نوێ هەڵبژێردران.     

 

سوڵتان ئۆزجان و جاهید کزکازاک بوونە هاوسەرۆک، ژمارەی ئەندامانی سەرکردایەتیش لە 100 کەسەوە کەمکرانەوە بۆ  39 ئەندام، هەروەها 15 ئەندامیش بەیەدەگ هەڵبژێردران. 

 

هەدەپە کە 11 ساڵە دامەزراوە، لە کۆنگرەکەدا خۆی هەڵنەوەشاندەوە و بڕیاریدا بۆ لەمەودوا لە گۆڕەپانی سیاسەتدا کەمتر چالاک بێت و لە شوێنی هەدەپە پارتی چەپی سەوز-یەسەپە چالاکتر دەبێت. 

 

هەدەپە لە حوزەیرانی 2021ـەوە بە تۆمەتی پەیوەندی بە پەکەکە لە دادگە دۆسیەی داخستنی لەسەر تۆمارکراوە و بەهۆی بەردەوامی دۆسیەکەی لە دادگەی دەستوور، لە هەڵبژاردنی سەرۆکایەتی و پەرلەمانیی تورکیا کە لە 14 و 28ـی ئایاری ئەمساڵ بەڕێوەچوو، لەسەر ناوی پارتی چەپی سەوز-یەسەپە بەشداری لە هەڵبژاردنەکاندا کرد. 

 

هەدەپە کە خۆی وەک پارتێکی تورکیایی پێناسە دەکات و زۆرینەی دەنگدەرەکانی کوردن، بانگەشەی ئەوەی دەکرد لەو هەڵبژاردنەدا کورسییەکانی بەراورد بە هەڵبژاردنەکانی ساڵی 2018 لە 67 کورسی بۆ 100 کورسی زیاد دەکات، بەڵام ئەنجامەکە پێچەوانە بوو و تەنیا 61 کورسی پەرلەمانی بەدەستهێنا.  

 

ئەنجامی هەڵبژاردنەکان هۆکاری سەرەکی بەستنی ئەم کۆنگرەیە بوو. هەر لە دوای هەڵبژاردنەکانیشەوە هاوسەرۆکانی ئەو پارتە ئاماژەیان بە بەستنی کۆنگرەیەکی نائاسایی دا و رایانگەیاند، لە کۆنگرەکەدا جارێكی دیکە خۆیان بۆ پۆستی هاوسەرۆکایەتی بەربژێر ناکەن.