بەتۆمەتی ئاگرکەوتنەوەی دارستانی ئیزمیر 4 کەس دەستبەسەرکران
رووداو دیجیتاڵ
وەزیری دادی تورکیا رایگەیاند، بەهۆی ئاگری دارستان لە ئیزمیر کە بەهۆیەوە سێ کەس گیانیان لەدەستدا، چوار کەس دەستبەسەرکراون.
یڵماز تونچ، ئێوارەی رۆژی دووشەممە 15ـی تەممووز رایگەیاند، لە چوارچێوەی ئەو لێکۆڵینەوەیەی سەرۆکایەتیی داواکاری چەشمە لەبارەی کەوتنەوەی ئاگر لە دارستانەکانی شارۆچکەی چەشمە ـی ئیزمیر دەستیپێکردووە، چوار گومانلێکراو دەستبەسەرکراون.
وەزیری داد دەڵێ، بە هەستیارییەوە لێکۆڵینەوە لە رووداوەکە بەردەوامە.
ئاگرەکە رۆژی دووشەممە 15ـی تەممووز لە دارستانێکی ناوچەی دەلیلکۆی سەر بە شارۆچکەی چەشمە بەربوو و، هێشتا هۆکارەکەی دیار نییە .
دوای ئاگادارکردنەوەیان، دوو فڕۆکە، چوار هێلیکۆپتەر، 16 ئۆتۆمبێلی ئاگرکوژێنەوە، سێ تانکەری ئاو، سێ شۆفڵ و تیمی ئاگرکوژێنەوەی سەر بە بەڕێوەبەرایەتی ناوچەی دارستانی ئیزمیر رەوانەی شوێنەکە کران و ئێوارەی هەمان رۆژ ئاگرەکە کۆنتڕۆڵکرا.
ناوچە دارستانییەکانی چەشمە خەڵکیشی لێ دەژین. ئاگرەکە وایکرد ژمارەیەکی زۆر لە خەڵکی ناوچەکە بەپەلە ماڵ و حاڵیان جێبهێڵن.