لە ئەنجامی داڕمانی کانێكی خەڵووز لە تورکیا دوو کەس گیانیان لەدەستدا

 

کاژێر 23:00ـی شەوی پێنجشەممە 14ـی کانوونی یەکەمی 2023 لە گوندی کارئیسمائیللیەر سەر بە شارۆچكەی ئاجیپایام، کانێکی خەڵووز بە هۆکارێكی نادیار داڕما، سێ کەس لە نێو کانەکەدا گیریانخوارد.

 

تیمەکانی بەرگریی شارستانی، ئافاد و تەندروستی رەوانەی شوێنی رووداوەکە کران، هەر یەک لە ئەندازیار قادر ئۆزەر و کرێکارێک بە ناوی رەفعەت سەلمان بە مردوویی و کرێکارێكی دیکەش بە ناوی مستەفا کاراهان بە برینداری لە کانەکە دەرهێنران.

 

بریندارەکە گواسترایەوە نەخۆشخانەی زانکۆی پاموککالە و ئەو دوو کەسەی دیکەش کە لە رووداوەکەدا گیانیان لەدەستدابوو برانە بەشی دادپزیشکیی نەخۆشخانەکە.

 

عومەر فارووق جۆشکون پارێزگاری دەنیزلی سەردانی شوێنی رووداوەکەی کرد و رایگەیاند، لێکۆڵینەوە لە رووداوەکە دەستیپێکردووە.