شارەوانیی ئیستەنبووڵ کۆرسی فێربوونی زمانی کوردی دەکاتەوە

 

پەیمانگەی ئیستەنبووڵ، کە سەر بە گەورەشارەوانیی ئیستەنبووڵە لە ماوەی چوار ساڵی رابردوودا لە سەرتاسەری ئەو پارێزگایە لە 150 سەنتەردا کۆرسی جیاواز پیشەیی و پەروەردەیی دەکاتەوە. خوێندن و فێربوون لەو سەنتەرانە بۆ ئەم وەرزە نوێیە ئەکادیمییە دەستیپێکردووە.

 

بەگوێرەی زانیارییەکانی تۆڕی میدیایی رووداو، لە 4ـی ئەیلوولەوە داواکاری بۆ کۆرسی زمانی کوردی دەستیپێکردووە و بۆ ماوەی 20 رۆژ بەردەوام دەبێت.

 

کۆرسی شێوەزاری زازاکی 23ـی ئەیلوولی 2023 دەستپێدەکات و لە شوباتی 2024 کۆتایی دێت.

 

هەروەها خولی ئاستی A1 ـی شێوەزاری کورمانجی لە 20ـی ئەیلوول دەستپێدەکات و تاوەکو 15ـی کانوونی یەکەمی 2023 بەردەوام دەبێت.

 

بۆ ئەمساڵ لەو کۆرسانەدا 20 کورسی بۆ شێوزارەکانی کورمانجی و زازاکی زمانی کوردی دەستنیشانکراوە، بەڵام پێشبینی دەکرێت بەپێی داواکارییەکان ژمارەی کورسییەکان زیاد بکات.

 

لەکۆتایی هەر خولێکدا بڕوانامەیەکی فەرمی، کە لەلایەن وەزارەتی پەروەردەی تورکیاوە پەسند کراوە، دەدرێتە بەشداربووانی خولەکە و ئەمەش خواستی لەسەر ئەو خولانە زیاتر کردووە بەتایبەت لەم ساڵانەی دواییدا.