سەرۆکی جەهەپە: باخچەلی بە دەم پارتی دەگوت تیرۆریست و لە پەرلەمان تەوقەی لەگەڵ کردن

 

 

ئۆزگور ئۆزێل سەرۆکی جەهەپە رۆژی پێنجشەممە 3-10-2024 سەردانی شارەوانیی ئەنتاڵیای کرد و لە کۆنفرانسێکی رۆژنامەڤانیدا باسی لە چەند تەوەرێکی جیاواز کرد.

 

سەرۆکی جەهەپە رەخنەی لە دەولەت باخچەلی گرت و ئاماژەی بەوەکرد کە مەهەپە بە هەموو شێوەیەک دەم پارتی بە "تیرۆریست" ناوزەد دەکات، بەڵام چوونەتە لایان و تەوقەیان لەگەڵدا دەکەن.

 

ئۆزەل گوتیشی: "ئەو پارتەی هاوسەرۆکەکەی بە دەستبەسەرکردن دا و دەیگوت با نەیەتە دەرەوە، ئەو پارتەی دەیگوت با هاوکاریی دارایی پێنەدرێت، هەر خۆیان چوون و تەوقەیان کرد. بەخوا من پێشتر هێندەی بەڕێز دەولەت بەو گەرم و گوڕییەوە تەوقە و باوەشم لەگەڵ نەکردوون".

 

لە دوای دوو مانگ لە پشوو، پەرلەمانی تورکیا رۆژی سێشەممە 1-10-2024 دەستی بە کۆبوونەوەکانی کردەوە. لە کاتی دانیشتنی پەرلەمانی تورکیادا دەولەت باخچەلی، سەرۆکی پارتی بزووتنەوەی نەتەوەیی (مەهەپە) لە ناو هۆڵی پەرلەماندا سەردانی فراکسیۆنی پارتی یەکسانی و دیموکراسیی گەلان (دەم پارتی)ی کرد و تەوقەی لەگەڵ تونجەر باکرهانی هاوسەرۆکیان و سەزایی تەمەللی، پەرلەمانتار کرد.

 

دیمەنی ساتی چوونی باخچەلی بۆ لای دەم پارتی و تەوقەکردن و گفتوگۆکانیان بە خێرایی لە میدیای تورکیادا بڵاوبووەوە و بووە رۆژەڤی ئەو وڵاتە.

 

لەمبارەیەوە دەولەت باخچەلی وەڵامی پرسیاری میدیای دایەوە و گوتی: "دەڕۆینە قۆناخێکی نوێ. پێموایە لەکاتێکدا لە جیهاندا داوای ئاشتی دەکەین، پێویستە لە وڵاتەکەماندا ئاشتی فەراهەم بکەین".

 

ئەم پێشهاتە لەکاتێکدایە، دەولەت باخچەلی لە گوتارەکانیدا رەتیدەکاتەوە دەم پارتی، پارتێکی سیاسی بێت و بە باڵی سیاسیی پارتی کرێکارانی کوردستان (پەکەکە) ناوی دەبات.