کورتهێنانی بازرگانیی دەرەکیی تورکیا گەیشتووەتە 106 ملیار دۆلار

 

 

وەزارەتی بازرگانیی تورکیا ئەمڕۆ چوارشەممە 03-01-2024 داتاکانی پەیوەست بە بازرگانیی دەرەوەی بۆ مانگی 12ی 2023 بڵاوکردەوە. بەپێی داتاکان بێت، تورکیا لە مانگی کانوونی یەکەمی 2023دا بە بەهای 23 ملیار دۆلار کاڵای هەناردە کردووە و بە بەهای 29.1 ملیار دۆلاریش کاڵای هاوردە کردووە. بەمشێوەیە، کورتهێنانی بازرگانیی دەرەکیی تورکیا لە مانگی کانوونی یەکەمی 2023ـدا، بەراورد بە هەمان مانگی ساڵی 2022، بە رێژەی 37% کەمیکردووە و بۆ 6.1 ملیار دۆلار دابەزیوە.

 

کورتهێنانی بازرگانیی دەرەکی لە 12 مانگی ساڵی 2023دا گەیشتووەتە 106 ملیار دۆلار؛ کورتهێنانی بازرگانیی دەرەکیی تورکیا لە ساڵی 2022دا 109.5 ملیار دۆلار بووە و لە 2023دا بەراورد بە ساڵی پێشووتر بە رێژەی 3.2% کەمیکردووە.

 

لە ساڵی 2023دا تورکیا بە بەهای 255.8 ملیار دۆلار هەناردەی کردووە و بە بەهای 361.8 ملیار دۆلاریش کاڵای هاوردە کردووە.