بوومەلەرزەیەک پارێزگای حەمای سووریای هەژاند

 

 

بەپێی داتاکانی سەنتەری بومەلەرزەزانی ئەورووپا، ئەمڕۆ هەینی، 16ـی ئاب بوومەلەرزەیەک بە گوڕی 5.2 رێختەر لە پارێزگای حەمای سووریا روویداوە، شارۆچکەی سەلەمییە چەقی بوومەلەرزەکە بووە و لە چەند پارێزگایەکی تورکیا و باکووری کوردستانیش هەستی پێکراوە.  

 

سەرۆکایەتیی کارەساتی لەناکاو و فریاگوزاریی تورکیا - ئافاد لە هەژماری فەرمی خۆی لە تۆڕی کۆمەڵایەتی ئێکس رایگەیاند، کاژێر13:15 خولەکی ئەمڕۆ هەینی 16ـی ئاب، بوومەلەرزەیەک بە گوڕی 5.2 پلەی رێختەر لە پارێزگای حەما روویداوە.

 

چەقی بوومەلەرزەکە شارۆچکەی سەلەمییە بووە کە بە دووری 119 کیلۆمەتر لە شارۆچکەی یایلاداغی سەر بە پارێزگای هاتای تورکیا هەڵکەوتووە. 

 

بەگوێرەی ئافاد، بوومەلەرزەکە لە قوڵایی حەوت کیلۆمەتر تۆمار کراوە.

 

بوومەلەرزەکە لە پارێزگاکانی هاتای و عوسمانییەی تورکیا و کیلیس و دیلۆکی باکووری کوردستان هەستیپێکراوە و ترس و دڵەراوکێی لە نێو خەڵکی دروستکردووە.