بەشێک لە هاونیشتمانییانی رووها شەوان لەنێو ئۆتۆمبێلەکانیان دەخەون

 

حاجی بوڵووت، کەسوکاری قوربانییەکان دەڵێت، "شەش کەسی ئێمە لەژێر باڵەخانە رووخاوەکاندان. براکەم، خێزانی و دوو منداڵی لەگەڵ دایک و باوکم. نزا دەکەم لە خوا بەڵکو ئینشاڵڵا سەلامەت بن."

 

ئەمین گونەیش، هاونیشتمانییەکی دیکەی کەسوکاری قوربانییەکانە و باس لەوە دەکات کە ژمارەیەک لە کەسە نزیکەکانی هێشتا لەژێر داروپەردووی باڵەخانە رووخاوەکاندان و چاوەڕێی کاری تیمەکان دەکەن بەڵکو بە زیندوویی بیاندۆزنەوە.

 

شاری رووهای باکووری کوردستان یەکێکە لەو شارانەی تورکیا و باکووری کوردستان کە بەهۆی بوومەلەرزەکەوە دەیان باڵەخانە و یەکەی نیشتەجێبوون تێیدا رووخا و بەپێی دوایین ئامار، تاوەکو ئێستا زیاتر لە 95 کەس گیانیان لەدەستداوە و نزیکەی دوو هەزار کەسی دیکەیش بریندار بوون.

 

تیمەکانی بەرگریی شارستانی و فریاگوزاری بەردەوامن لە گەڕان بە دوای بێسەروشوێنبووانی بوومەلەرزەکە.

 

شەنای پۆڵات، کەسوکاری قوربانییەکان بە رووداوی گوت، "شەش کەسمان مردوون، یەکێکیان دەرهێناوە و ئەوانی دیکەیش هێشتا لەژێر باڵەخانە رووخاوەکەن."

 

ئیبراهیم گونبای، هاونیشتمانییەکی دیکەی کەسوکاری قوربانییەکانە و دەڵێت، "حەوت کەسی تێدا بوو، یەکێک بە سەلامەتی دەرکەوت و ئەوانی دیکەیش گیانیان لەدەستداوە." 

 

عیسمەت پۆڵات کە چەند کەسێکی هێشتا لەژێر داروپەردووی باڵەخانە رووخاوەکاندان، دەڵێت، "هاتووین چارەنووسێکی کەسوکارمان بزانین، 4-5 کەسی تێدایە و لە ژێر باڵەخانەکاندا ماون کە بۆ میوانی هاتبوون."

 

لە رووها بەهۆی ترس و ئەگەری روودانی بوومەلەرزەی دیکە، زۆرینەی خەڵک لەنێو ئۆتۆمبێلەکانیان دەخەون و هەندێکیشیان کەسوکارەکانیان بردووەتە گوندەکان.

 

زەینل عابدین بەیازگوول، سەرۆکی شارەوانیی رووها بە تۆڕی میدیایی رووداوی راگەیاند، "بۆ ئەو کەسانەی لە دەرەوە ماونەتەوە ئەم کارەمان کردووە. ئێمە خانووەکانی دەوڵەتمان لە کۆمەڵگە وەرزشی و شوێنی پێشانگەکان و هۆڵی وەرزشی وەزارەت و شوێنی پرسەکان و باڵەخانە کولتوورییەکانی ئورفەمان بۆ لێقەوماوان دابینکردووە، هاووڵاتییانمان شەوانە لەم شوێنانە دەخەون. وەکو شارەوانی هەوڵ دەدەین هەموو پێداویستییەکانیان بۆ دابین بکەین."

 

سەرۆکایەتیی کارەساتی لەناکاو و فریاگوزاریی تورکیا -ئافاد کاژێر 7:30ـی ئێوارەی سێشەممە، 7-2-2023، بڵاویکردەوە، ژمارەی ئەوانەی بەهۆی بوومەلەرزەکەوە لە تورکیا و باکووری کوردستان گیانیان لەدەستداوە گەیشتە چوار هەزار و 544 کەس، هەروەها 26 هەزار و 721 کەس بریندارن.