عێراق: زرێپۆشمان دروستکردووە

 

ئەمڕۆ دووشەممە، 30ـی ئەیلوولی 2024، عەبدولئەمیر شەمەری، وەزیری ناوخۆی عێراق لە بەغدا لە پێشانگەی چەک و کەرەستەی سەربازی بەشداریکرد.

 

زیاد ئیسماعیل، پەیامنێری تۆڕی میدیایی رووداو لە بەغدا، لە رێوڕەسمەکەدا ئامادەبوو و پرسیاری لە وەزیری ناوخۆی عێراق کرد لەبارەی گرێبەستەکانیان لەگەڵ دەستەی بەرهەمهێنانی سەربازی و جەنگی عێراق. 

 

وەزیری ناوخۆی عێراق بە پەیامنێری رووداوی گوت، "وەزارەتی ناوخۆ گرێبەستی زۆری لەگەڵ دەستەکە هەیە کە بەشێکیان تایبەتن بە زریپۆش. لە گرێبەستەکەدا داوای 250 زریپۆشمان کردووە و ئەمڕۆ کاروانی یەکەمی زریپۆشەکان وەردەگرین کە ژمارەیان 50 دانەیە". 

 

وەزیری ناوخۆی عێراق گوتیشی، "گرێبەستی دیکەمان تایبەت بە دروستکردنی چەک و کامێرا و بەرهەمی دیکە هەیە".

 

عەبدولئەمیر شەمەری سوپاسی هەوڵە بەردەوامەکانی سەرۆکی دەستەی بەرهەمهێنانی سەربازی کرد و گوتی، "ئەم بەرهەمانە زۆر هاوکارمان بوون و دەبن لە بابەتی بەرەنگاربوونەوەی تیرۆردا". 

 

 

رووداو: جەنابی وەزیر، بە ئەرک نەبێت بۆ رووداو قسە بکەیت لەبارەی ئەم بەرهەمانە. ئایا ئەم بەرهەمانە هاوکار دەبن بۆ عێراق لەپێناو کەمکردنەوەی گرژییەکانی ناوچەکە؟ 

 

شەمەری: سوپاس، بەناوی خوای گەورە و میهرەبان، بەدڵنیاییەوە پاڵپشتیکارین بە دەستەی بەرهەمهێنانی سەربازی بە هەموو بەرهەمەکانی. وەزارەتی ناوخۆ گرێبەستی زۆری لەگەڵ دەستەکە هەیە. لە گرێبەستەکەدا داوای 250 زرێپۆشمان کردووە و ئەمڕۆ کاروانی یەکەمی زرێپۆشەکان وەردەگرین کە ژمارەیان 50 زریپۆرشە. ئەوە جگە لە چەک و کامێرا و تەواوی بەرهەمەکانیان. سەرباری ئەوەش، هاوبەشی درێژخایەنمان لەگەڵیان واژۆ کردووە بۆ پێدانی ئاسن و کانزا. سوپاس و پێزانینمان بۆ هەوڵە بەردەوامەکانی سەرۆکی دەستەی بەرهەمهێنانی سەربازی و سەرجەم کارمەندانیان لە دروستکردنی چەک و کەرەستەی سەربازیی نێوخۆیی کە دروستکراوی عێراقن. ئەم بەرهەمانە زۆر هاوکارمان بوون و دەبن لە پرسی بەرەنگاربوونەوەی تیرۆر.