سێ تەقینەوە لە بەغدا روویاندا؛ کوژراو و بریندار هەن

پەیامنێری رووداو لە بەغدا رایگەیاند، سێ تەقینەوە لە ناوچەکانی بەلەدیات، شەعب و بەیاع روویانداوە و بەهۆیەوە شەش کەس گیانیان لەدەستدا و زیاتر لە  13 کەسی دیکە برینداربوون. 

 

هەڵکەوت عەزیز، پەیامنێری رووداو لە بەغدا ئاماژەی بەوە کرد، تەقینەوەکەی ناوچەی بەلەدیات بەهۆی بۆمبەوە بووە و تەقینەوەکانی ناوچەی بەیاع و شەعبیش لەڕێگەی مۆتۆرسکیلەوە ئەنجامدراون. 

 

تەقینەوەکان لەکاتێکدان، رێوشوێنێکی تووندی ئەمنی لە بەغدا گیراوەتەبەر و خۆپیشاندانەکانیش بەردەوامن. ئەمڕۆش بەهۆی پێکدادان لەنێوان خۆپیشاندەران و هێزە ئەمنییەکان کەسێک کوژرا. 

 

پەیامنێری رووداو راشیگەیاند، بەپێی ئامارە سەرەتاییەکان شەش کەس کوژراون و زیاتر لە 13 کەسی دیکەش برینداربوونە.