ئێران دووەم گەورەترین هەناردەکاری فستقە بۆ ئەورووپا

 

 

یۆرۆستات، ناوەندی ئاماری یەکێتیی ئەورووپا رایگەیاند، لە چارەکی یەکەمی ئەم ساڵدا، بایی 36 ملیۆن و 950 هەزار دۆلار، فستقیان لە ئێرانەوە هاوردە کردووە.

 

بەپێی یۆرۆستات، هاوردەی فستقی ئێرانی لەلایەن وڵاتانی ئەورووپییەوە بەراورد بە ساڵی رابردوو 17% زیاد بووە.

 

لە چارەکی یەکەمی ساڵی 2023دا، ئێران بایی 32 ملیۆن و 520 هەزار دۆلار فستقی هەناردەی یەکێتیی ئەورووپا کردبوو.

 

وەکو لە ئامارەکەدا هاتووە، لەو چارەکەدا بە پێچەوانەی زیادبوونی هەناردەی جۆرەکانی فستق، هەناردەی جۆری فستقی بە توێکڵی ئێران بۆ ئەورووپا 3% دابەزیوە.

 

لەنێو وڵاتانی ئەورووپیدا، ئەڵمانیا گەورەترین هاوردەکاری فستقی ئێرانی بووە لە سێ مانگی یەکەمی ئەم ساڵدا و بایی 26 ملیۆن دۆلار و 410 هەزار دۆلاری هاوردە کردووە. بەو پێیە، نزیکەی 71%ی هەناردەی فستقی ئێران بۆ ئەڵمانیا بووە.

 

لە چارەکی یەکەمی ئەم ساڵدا، دوای ئەمریکا، ئێران دووەم گەورەترین هەناردەکاری فستقە بۆ یەکێتیی ئەورووپا.