نوێنەری پێشووی عەلی خامنەیی لە باکووری ئێران کوژرا

 

عەباسعەلی سولەیمانی، پێشنیوەڕۆی ئەمڕۆ چوارشەممە، لەنێو بانکێک لە نێوشاری بابولسەری پارێزگای مازەندەران لە باکووری ئێران تەقەی لێکرا و کوژرا.

 

میدیای ئێران رایگەیاندووە، بکوژ بە چەکی پاسەوانی بانک تەقەی لە عەباسعەلی سولەیمانی کردووە و کوشتوویەتی و، سێ کەسی دیکەش بریندار کراون.

 

رووحوڵڵا سەلەگی، جێگری پارێزگاری مازەندەران بۆ کاروباری سیاسی و ئەمنی رایگەیاند، بکوژ لەلایەن هێزە ئەمنییەکانەوە دەستبەسەر کراوە.

 

پلەی ئایینیی عەباسعەلی سولەیمانی ئایەتوڵڵا بوو و، پێشتر پێشنوێژی حکومی شاری زاهیدان و هەروەها نوێنەری رێبەری کۆماری ئیسلامیی ئێران بوو لە پارێزگای سیستان و بەلوچستان. ئەو هەروەها ئەندامی ئەنجوومەنی شارەزایانی رێبەریی ئێرانە کە ئەنجوومەنێکی تایبەت بە دەستنیشانکردن و لەسەر کار لابردنی رێبەری کۆماری ئیسلامیی ئێرانە.

 

تائێستا هۆی تەقەکردن لە عەباسعەلی سولەیمانی و کوشتنی دیار نییە و بەرپرسانی پارێزگای مازەندەران رایانگەیاندووە، دوای لێکۆڵینەوە لە بکوژ، زانیاری زیاتر بڵاو دەکەنەوە.