گومرگی ئێران: لە ساڵێکدا بە بەهای 3.2 ملیار دۆلار مۆبایل هاوردە کراوە

 

گومرگی ئێران ئامارێکی لەبارەی هاوردەکردنی مۆبایل لە لایەن ئەو وڵاتەوە بڵاوکردەوە و رایگەیاند، لە ماوەی ساڵێکدا (لە 21-03-2023 تاوەکو 21-3-2024) لە رێگەی گومرگ و دەروازە سنوورییەکانەوە 14 ملیۆن و 688 هەزار و 580 ئامێری مۆبایل هاوردەی ئەو وڵاتە کراون.

 

بەپێی گومرگی ئێران، بەهای سەرجەم مۆبایلە هاوردەکراوەکان 3 ملیار و 202 ملیۆن دۆلار بووە.

 

هەر بەپێی ئامارەکانی گومرگی ئێران، لەو ژمارەیە 14 ملیۆن و 222 هەزار و 306 ئامێری مۆبایل بە بەهای 2 ملیار و 932 ملیۆن دۆلار بە شێوەی بازرگانی هاوردە کراون، بەشەکەی دیکەش کە دەکاتە 466 هەزار و 274 مۆبایل و بە بەهای 270 ملیۆن دۆلارە، لە رێگەی گەشتیارییەوە بووە.

 

گومرگی ئێران دەڵێت، هاوردەکردنی مۆبایل 4.5٪ـی کۆی هاوردەکردنی ئەو وڵاتە لە ماوەی ساڵێکدا پێکدەهێنێت.