ئەنجوومەنی باڵای ئاسایشی نیشتمانیی ئێران: ئیسرائیل هەوڵیداوە ناوەندێکی هەستیاری ئیسفەهان بتەقێنێتەوە

 

 

ماڵپەڕی نوورنیوزی سەر بە ئەنجوومەنی باڵای ئاسایشی نیشتمانیی ئێران رۆژی 24-7-2022 بڵاویکردەوە، ئەو کەسانە لە کاتێکدا دەستگیرکراون کە "تەنانەت تەقەمەنی زۆر بەهێزیان لە شوێنی مەبەست دانابوو و تەنیا چەند کاژێرێک مابوو قۆناخی کۆتایی ئۆپەراسیۆنەکە"یان ئەنجامبدەن.

 

وەزارەتی ئیتلاعاتی ئێران رۆژی 23-7-2022 بڵاویکردەوە، "تیمێکی سەر بە دەزگای هەواڵگری ئیسرائیل کە بۆ ئۆپەراسیۆنێکی تیرۆریستی رەوانەی ئێران کرابوون"، دەستبەسەر کراون.

 

ماڵپەڕی نوورنیوز بڵاویکردووەتەوە، ئەندامانی ئەو تیمە چەندین مانگ لە وڵاتێکی ئەفریقیدا راهێنانیان پێکراوە و ئەو ئۆپەراسیۆنەی بڕیار بوو لە ئێراندا ئەنجامیبدەن، چەندین جار راهێنانیان لەسەری کردووە.

 

لەو راپۆرتەدا هاتووە، ئەو تیمە چەندین مانگ لەمەوبەر لە رێگەی هەرێمی کوردستانەوە چوونەتە نێو ئێران و "ناوەندێکی هەستیاریان لە ئیسفەهان دەستنیشان کردووە و ویستوویانە بیتەقێننەوە." 

 

لەوبارەوە، عەبدوڵڵا ئاکرەیی، بەرپرسی پەیوەندییەکانی هەرێمی کوردستان لەگەڵ ئێران رۆژی 23-7-2022 بە تۆڕی میدیایی رووداوی راگەیاند: "لەبارەی راگەیاندنەکەی وەزارەتی ئیتڵاعاتی ئێرانەوە، پەیوەندیم بە نوێنەری ئەو وەزارەتەوە لە هەولێر کرد و پێیان راگەیاندم کە لە راگەیێندراوەکەیاندا حکومەتی هەرێمی کوردستانیان تۆمەتبار نەکردووە و تەنیا گوتوویانە لە خاکی هەرێمی کوردستانەوە چوونەتە نێو ئێران."