وەزیری پێشووتری دەرەوەی ئێران: تاوانباری رووداوی کەوتنە خوارەوەی هێلیکۆپتەرەکە ئەمریکایە

 

رۆژی دووشەممە، 20-05-2024، محەممەد جەواد زەریف، وەزیری پێشووتری دەرەوەی ئێران لە هەڤپەیڤینێک لەگەڵ تەلەفیزیۆنی فەرمیی وڵاتەکەی گوتی: "سزاکانی ئەمریکا بووە هۆی پەککەوتنی تواناکانی ئێران لە دەستخستنی فڕۆکە و هێلیکۆپتەری نوێ."

 

زەریف گوتیشی: "یەکێک لە تاوانبارانی تراژیدیایەکەی دوێنێ ئەمریکایە، چونکە بەهۆی سزاکانی ئەوانەوە ئێران نەیدەتوانی پارچەی یەدەگ بکڕێت."

 

لێدوانەکانی وەزیری پێشووتری ئێران لەکاتێکدایە، پەیوەندییەکانی ئێران لەگەڵ ئەمریکا لەوپەڕی خراپیدایە بەڵام لەگەڵ چین و رووسیا زۆر بەهێزە، ئەمەش بووەتە هۆی دروستکردنی تێبینی و پرسیار لەسەر ئەوەی هێشتا ئێران پشت بە هێلیکۆپتەری ئەمریکیی کۆن دەبەستێت، لەوانەش بێڵ 212.

 

ئەو هێلیكۆپتەرە لەلایەن كۆمپانیای (بیڵ هێلیكۆپتەرز)ەوە لە سەرەتای حەفتاکانی سەتەی رابردوو دروستکراوە و دەتوانێت چەندین ئەرک بەجێبهێنێت. لەدوای دروستکردنیەوە بۆ گواستنەوەی سڤیل، سەربازی و فریاگوزاری بەکارهێندراوە. 

 

فارس جواری، توێژەر و راوێژکاری فڕۆکەوانی لە ریازی پایتەختی سعودیەوە میوانی رووداو بوو باسی لە تایبەتمەندی (بێڵ 212) کرد و گوتی: "هێلیکۆپتەرەکەی کۆمپانیای بیڵی ئەمریکی لە حەفتاکانی سەتەی رابردووەوە دوای دروستکردنیان لە ئێران کڕدراون و بەکارهێندراون."

 

بە گوتەی جواری، بەرهەمهێنانی ئەو هێلیکۆپتەرانە لە هەشتاکانەوە راگیراون. گوتیشی: "فڕۆکەیەکی باشە، بەڵام بەهۆی گەمارۆی سەر ئێران، پێدەچێت کەرەستەی نۆژەنکردنەوەی وەکو پێویست لە ئێران نەبووبێت."

 

درێژیی هێلیكۆپتەرەکە 17.45 مەترە و بەرزییەكەی 3.8 مەتر؛ کێشەکەشی بە بەتاڵی نزیکەی 2 هەزار و 962 كیلۆیە و خێراییەکەی 190 كیلۆمەترە لە كاژێرێكدا، هەروەها توانای هەڵگرتنی نزیکەی 2268 كیلۆ و 14 سەرنشینی هەیە.

 

فارس جواری گوتی، هێلیکۆپتەر ئامێری (ئی ئیل تی) تێدایە بۆ زانینی کەشوهەوای ئەو ناوچەیەی رووی تێدەکات و سەخت بێت ئاماژەی هەڵەبوونی گەشتەکەی پێدەدات، بەڵام "رەنگە هێلکۆپتەرەکەی سەرۆککۆمار ئەو ئامێرەشی تێدا نەبووبێت."

 

20ـی ئایار بەرپرسانى کۆمارى ئیسلامیی ئێران گیانلەدەستدانى ئیبراهیم رەئیسى، سەرۆککۆمار و حوسێن ئەمیرعەبدوڵڵاهیان، وەزیرى دەرەوەى ئێران و حەوت سەرنشینى دیکەى ئەو هێلیکۆپتەرەیان راگەیاند، کە 19ـی ئایار تێکشکا.

 

هێلکۆپتەرەکەى سەرۆککۆمار لە کاتى گەڕانەوەیدا لەسەر سنووری ئازەربایجان بەرەو شارى تەورێزی ناوەندی پارێزگای ئازەربایجانی رۆژهەڵاتی ئێران، تێکشکا و دواى زیاتر لە 16 کاژێر گەڕان، تیمەکان توانیان بگەنە شوێنى تێکشکانەکە.