ئاگرێکی گەورە لە بازاڕێکی تاران کەوتەوە؛ 30 دووکان و کۆگە سووتان

 

 

ئاگرەکە بەرەبەیانی ئەمڕۆ سێشەممە، 15-8-2023 لە مۆڵێکی شاری تاران کەوتەوە.

 

سەیید جەلال مەلیکی، گوتەبێژی بەرگریی شارستانیی تاران دەڵێت، "کاژێر 02:00ی بەرەبەیانی ئەمڕۆ سێشەممە بە کاتی تاران (01:30ی بەرەبەیان بە کاتی هەولێر) ئاگادار کراینەوە کە رووداوێکی ئاگرکەوتنەوە لە نێو بازاڕی تاران هەیە و لە مۆڵێکدا ئاگر لە چەندین دووکان و کۆگە کەوتووەتەوە؛ بۆیە دەستبەجێ تیمەکانی بەرگریی شارستانیمان ناردە شوێنی رووداوەکە".

 

سەیید جەلال مەلیکی گوتی، لەو بازاڕەدا زیاتر لە 250 دووکان و کۆگە هەن کە بەهۆی ئاگرکەوتنەوەکەی ئەمڕۆوە 30 دووکان و کۆگە بە رێژەی 30٪ تا 100٪ سووتاون.

 

بە گوتەی سەیید جەلال مەلیکی، ئاگرەکە لە ژێرزەمینی بازاڕەکەوە دەستیپێکردووە و بە خێرایی بەرەو دووکان و کۆگاکانی دیکە تەشەنەی سەندووە، بەڵام تیمەکانیان توانیویانە لە ماوەیەکی کەمدا رێگە لە تەشەنەکردنی زیاتری بگرن.

 

سەبارەت بە زیانی ئاگرەکە، گوتەبێژی بەرگریی شارستانیی تاران دەڵێت، ئەم رووداوە هیچ بریندار و گیانلەدەستدانی نەبووە، بەڵام زیانێکی زۆری مادی بەر بازاڕەکە کەوتووە؛ ئاماژەی بەوەش کرد، لەلایەن تیمەکانیانەوە لێکۆڵینەوە لە رووداوەکە دەستیپێکردووە.