لە بنکەیەکی تەندروستیی تاران ئاگرکەوتەوە و سێ کەس گیانیان لەدەستدا

 

محەممەد ئیسماعیل تەوکولی، بەڕێوەبەری فریاکەوتنی پارێزگای تاران رایگەیاند، ئاگرەکە کاژێر 7:45ی دووشەممە لە بنکەیەکی تەندروستی لە ناوچەی مشیرییەی تاران کەوتووەتەوە، بەهۆیەوە سێ کەس گیانیان لە دەستداوە و 18 کەسیش بریندارن.

 

محەممەد ئیسماعیل تەوکولی گوتی،"یەکێک لەوانەی گیانی لە دەستداوە، منداڵێکی تەمەن 8 ساڵانە".

 

لەبارەی بە رەوشی بریندارەکان، بەڕێوەبەری فریاکەوتنی پارێزگای تاران رایگەیاند، تەندروستیی پێنج لە بریندارەکان خراپە و گوازراونەتەوە بۆ نەخۆشخانە.

 

بە گوتەی جەلال مەلەکی، گوتەبێژی ئاگرکوژێنەوەی شارەوانیی تاران، بنکە تەندروستییەکە 5 نهۆمە و  ئاگر لە دەرمانخانەی ئەو بنکە تەندروستییە کەوتووتەوە کە لە نهۆمی یەکەمە. تاوەکو ئێستاش هۆکاری ئاگرکەوتنەوەکە دیار نییە.