نووسینگەی سەرۆکوەزیرانی عێراق: سوودانی و ئەردۆغان رێککەوتنێکی ستراتیجی واژۆ دەکەن

 

ئەردۆغان نیوەڕۆی ئەمڕۆ (دووشەممە، 22-4-2024) گەیشتە پایتەختی عێراق و لە فڕۆکەخانەی نێودەوڵەتیی شارەکە لەلایەن محەممەد شياع سوودانی، سەرۆکوەزیرانی عێراقەوە بە گوتنەوەی سروودی نیشتمانیی عێراق و تورکیا، نمایشی پاسەوانی شەرەف پێشوازی لێکرا. 

 

نووسینگەی سەرۆکوەزیرانی عێراق لە راگەیێندراوێکدا  ئاماژەی بەوە کرد، "سوودانی و ئەردۆغان گفتوگۆی دووقۆڵیی فەرمی دەکەن، هەروەها لەسەر ئاستی حکومی و وەزیرانی هەردوولا، گفتوگۆی فراوان دەکرێت." 

 

نووسینگەی سوودانی گوتیشی، لەم سەردانەی ئەردۆغاندا "رێککەوتنێکی دووقۆڵی ستراتیجی واژۆدەکرێت بۆ فراوانکردنی هاوبەشی لە بواری ئابووری، بازرگانی، ئاڵۆگۆڕی ئەزموون و رووبەڕووبوونەوەی ئاڵنگارییە ژینگەیی و هەرێمییە هاوبەشەکان".

 

بۆ گفتوگۆکانیان، سوودانی یاوەریی ئەردۆغانی کرد بۆ کۆشکی بەغدا. 

 

پێش گەیشتنی ئەردۆغان بە بەغدا، باسم عەوادی، گوتەبێژی حکومەتی عێراق بە رووداوی راگەیاند، زیاتر لە 22 رێککەوتن و لێکتێگەیشتن لە سەردانەکەدا واژۆدەکرێن.

 

عەوادی روونیکردەوە "تاوتوێى دۆسیەکانى ئاو، رێگەى گەشەپێدان، ئابوورى و ئاڵوگۆڕى بازرگانى، ئاسایش دەکرێن." 

 

دیارترین پرسە هەڵپەسێردراوەکان لەنێوان بەغدا و ئەنقەرە، بڕى بەردانەوەی ئاوى دیجلە و فوراتە بۆ نێو عێراق، هەروەها دۆسیەى ئاسایشى سنوورە.

 

گوتەبێژى حکومەتى عێراق گوتى، "سەرۆکوەزیران لە کۆنگرەیەکى رۆژنامەڤانیی هاوبەشدا لەگەڵ سەرۆککۆمارى تورکیا وردەکارى رێککەوتن و لێکتێگەیشتنەکان ئاشکرادەکات." 

 

رێگەى گەشەپێدان یەکێکى دیکەیە لەو پرسانەى رەجەب تەیب ئەردۆغان لەگەڵ بەرپرسانى عێراق تاوتوێى دەکات. پڕۆژەکە لە بەندەرى فاو لە بەسرە دەستپێدەکات و دەچێتە تورکیاوە و لە دوو هێڵى گواستنەوەى بازرگانى و گەشتیارى شەمەندەفەر و وشکانی پێکهاتووە. 

 

باسم عەوادی گوتی، "گرنگى ئەو سەردانە لەو دۆسیانەدایە کە تاوتوێ دەکرێن و پێشتر ئامادەکارى کراون." 

 

قەبارەى ئاڵوگۆڕى بازرگانیی ساڵانەى نێوان عێراق و تورکیا زیاتر لە 15 ملیار دۆلارە، وەزارەتى دەرەوەى تورکیا پێشبیکردووە بۆ ساڵى 2030 قەبارەکەى بگاتە 20 ملیار دۆلار.