ئەمریکا بەڵێن دەدات حوسییەکان سزابدات

 

 

رۆژی دووشەممە ئەمریکا سەرکۆنەی هێرشی درۆنیی حوسیەکانی بۆ سەر ئەبوزەبی کرد و بە هێرشێکی "تیرۆرستی" پۆڵێنی کرد. 

 

جەیک سولیڤان، راوێژکاری ئاساییشی نیشتمانیی ئەمریکا لە راگەیێندراوێکدا گوتی: "حوسییەکان بەرپرسیاریێتیی خۆیان لەم هێرشە دەربڕیوە، ئێمەش کار لەگەڵ ئیمارات و هاوبەشە نێودەوڵەتییەکانمان دەکەین بۆ ئەوەی سزایان بدەین."

 

هەروەها گوتیشی "پابەندبوونی ئێمە بە ئاساییشی ئیمارات پتەوە و ئێمە شان بە شانی هاوبەشە ئیماراتییەکانمان دەوەستینەوە دژی هەموو هەڕەشەیەک بۆ سەر خاکەکەیان."

 

هاوکات سکرتێری گشتیی نەتەوە یەکگرتووەکانیش سەرکۆنەی هێرشەکەی کرد و داوای لە هەموو لایەنەکان کرد دان بەخۆیاندا بگرن. 

 

ستێفان دوژاریک، گوتەبێژی سکرتێری گشتیی نەتەوە یەکگرتووەکان بە رۆژنامەڤانانی راگەیاند، "هێرش بۆ سەر خەڵکی سڤیل و شوێنە سڤیلەکان بە یاسای مرۆیی نێودەوڵەتی قەدەخەکراون."

 

لیز ترەس، وەزیری دەرەوەی بەریتانیاش لە تویتێکدا رایگەیاند: "من بە تووندترین شێوە هێرشە تیرۆرستییەکانی حوسییەکان بۆ سەر ئیمارات سەرکۆنە دەکەم.". 

 

لە هێرشە درۆنیەکانی حوسییەکان بۆ سەر ئەبوزەبی، سێ کەس کوژران و شەشی دیکەش بریندار بوون.

 

بەهۆی هێرشی درۆنە بۆمبڕێژکراوەکانەوە، سێ تانکەری سووتەمەنی لە نزیک کۆگایێکی نەوتی کۆمپانیای ئەدنۆک لە ئەبوزەبی تەقینەوە، لە ئەنجامدا دوو کەسی هیندی و یەکێکی پاکستانی گیانیان لەدەستدا، هەروەها لە شوێنێکی فڕۆکەخانەی ئەبوزەبی ئاگر کەوتەوە.

 

یەحیا سەریع، گوتەبێژی سەربازیی حوسییەکان رۆژی دووشەممە بەرپرسیاریێتیی خۆی لە هێرشەکان راگەیاند و داواشی لە خەڵکی سڤیل و بیانی کرد، "بۆ سەلامەتی خۆیان، خۆیان لە دامەزراوە گرنگەکان" لە نێو ئیماراتدا "بەدووربگرن."