تورکیا ساڵح موسلیمی خستە لیستی تیرۆر
رووداو - ئەنقەرە
ناوی ساڵح موسلیم، هاوسەرۆکی پێشووی پارتی یەکێتی دیموکراتی PYD خرایە لیستی تیرۆری وەزارەتی ناوخۆی تورکیا.
بەگوێرەی میدیاکانی تورکیا، وەزارەتی ناوخۆی تورکیا لیستی تیرۆری تازە کردەوە و ناوی ساڵح موسلیمی خستووەتە نێو لیستی ئەو کەسانەی تورکیا بە تاوانی تیرۆر بەدوایاندا دەگەڕێت.
ناوی ساڵح موسلیم خراوەتە لیستی سوور و بڕی 4 ملیۆن لیرەی تورکی (ملیۆنێک و 40 هەزار دۆلاری ئەمریکی) وەک خەڵات دەستنیشانکراوە بۆ ئەو کەسەی شوێنەکەی ئاشکرابکات.
وەزارەتی ناوخۆی تورکیا لە لیستە نوێیەکەدا 44 ناوی نوێی لە لیستی سوور و 26 ناوی نوێی لە لیستی شین، 34 لە لیستی سەوز، 37 لە لیستی پرتەقاڵی و 89 لە لیستی رەساسی زیادکردووە.
لە لیستی تیرۆری وەزارەتی ناوخۆی تورکیادا، کە کۆی گشتی ناوی 880 کەس هەیە، 128 کەس لە پارتی چەپی تووندئاژۆ، 599 کەس لە پەکەکە، 73 کەس لەو رێکخراوە تیرۆریستییانەی ئایین دەکەنە ئامراز، 80 کەسیش لە جەماعەتی فەتحوڵڵا گیولەنن.
ساڵح موسلیم خەڵکی کۆبانێیە و لە ساڵی 1951 لەدایکبووە، ئێستاش بەرپرسی پەیوەندییەکانی دەرەوەی تەڤدەمە. یەکێک لە کوڕەکانیشی لە شەڕی دژی داعشدا شەهیدبوو.
پێداچوونەوە: دەرباز ساڵح