میدیای ئیسرائیل: مەزەندە دەکرێت هەزار ئیسرائیلی کوژرابن

 

بەگوێرەی میدیای ئیسرائیل، مەزەندە دەکرێت هەزار ئیسرائیلی تائێستا لەئاکامی شەڕەکەدا کوژرابن و ژمارەی دیلەکانیش گەیشتووەتە 150 کەس، لە کاتێکدا وەزارەتی تەندروستیی ئیسرائیل بەفەرمی دەڵێت، 700 کەس کوژراون، بەڵام چاوەڕێدەکات ژمارەکە بەرزبێتەوە. 

 

بەگوێرەی وەزارەتەکە، ژمارەی بریندارانی ئیسرائیلیش گەیشتووەتە 2 هەزار و 200 کەس. 

 

لە کەرتی غەززەش، بەهۆی هێرشی فڕۆکە جەنگییەکانی ئیسرائیلەوە، 436 کەس گیانیان لەدەستداوە.

 

جۆناسان کۆنریکس، گوتەبێژی هێزی بەرگریی ئیسرائیل لەبارەی هێرشەکەی بەیانیی رۆژی شەممەی چەکدارانی بزووتنەوەی حەماس بۆ سەر ئیسرائیل رایگەیاند "هەڵسەنگاندنەکەمان ئەوەیە نزیکەی هەزار تیرۆریست لە هێرشەکەی داگیرکردنی ئیسرائیلدا بەشدار بوون. نزیکەی هەزار فەلەستینی تینووی خوێن، ماڵ بە ماڵ و باڵەخانە بە باڵەخانە بە شوێن هاووڵاتیانی سڤیلی ئیسرائیلیدا دەگەڕان و دەیانکوشتن. نزیکەی 700 ئیسرائیلی کوژران، چ هاووڵاتی سڤیل و چ سەرباز؛ زیاتر لە 2100 کەسیش برینداربوون."

 

ئەو بەرپرسەی ئیسرائیل هەروەها دەڵێ نزیکەی 100 هەزار سەربازی یەدەگمان کۆکردووەتەوە کە ئێستا لە باشووری ئیسرائیلن و لە ئامادەکاریدان بۆ جێبەجێکردنی ئەو ئەرکەی حکومەتی ئیسرائیل بە سوپای دەسپێرێت بە مەبەستی جێبەجێکردنی.