حەماس: هێرشی ئیسرائیل بۆ سەر رەفەح گفتوگۆی ئاگربەست لەنێودەبات

 

ئیسرائیل گوێی بە هۆشدارییە نێودەوڵەتییەکان نەدا و تانکی ناردە نێو شارەکەی باشووری کەرتی غەززە، کە زیاتر لە 1.3 ملیۆن ئاوارەی فەلەستینیی تێدا گیرساونەتەوە. 

 

رۆژی سێشەممە، ئیسرائیل دەستی بەسەر دەروازەی رەفەحدا گرت کە دەکەوێتە سەر سنووری میسر و دەرەچەی سەرەکی رۆیشتنی یارمەتییە مرۆییەکانە بۆ کەرتی غەززە. 

 

رۆژی پێنجشەممە، عیزەت ریشق، بەرپرسی حەماس لە راگەیێندراوێکدا ئاماژەی بەوە کرد، ئامانج لە هێرشی ئیسرائیل بۆ سەر رەفەح و دەروازە سنووریەکەی، "دروستکردنی بەربەستە بۆ هەوڵی نێوەندگیرەکان" کە دەیانەوێت حەماس و ئیسرائیل رازیبکەن شەڕ بوەستێنن. 

 

بەڵام بە گوتەی ئەو بەرپرسە، حەماس هێشتا پابەندە بە "پەسندکردنی پێشنیازی ئاگربەست کە لە لایەن نێوەندگیرەکانەوە خراوەتەڕوو."

 

بەرپرسەکە هەروەها باسی لەوە کرد، شاندێکی حەماس قاهیرەی جێهشتووە و گەڕاوەتەوە دەوحەی پایتەختی قەتەر. 

 

میسر، قەتەر و ئەمریکا لە هەوڵدان بۆ ئەوەی ئاگربەستێک لە غەززە بێننە کایەوە. 

 

بڕیاربوو رۆژی پێنجشەممە، گفتوگۆکان لە پایتەختی میسر بە بەشداریی شاندی میسری، قەتەری، ئەمریکی و حەماس بەردەوام بن.