ئەمریکا باری نائاسایی تایبەت بە سووریای بۆ ماوەی ساڵێک درێژکردەوە

 

رۆژی 8ـی ئایاری 2024، کۆشکی سپی لە راگەیێندراوێکدا داوای لە بەشار ئەسەد، سەرۆکی سووریا کرد "توندوتیژییەکانی بەرامبەر گەلەکەی رابگرێت" و داوای ئاگربەستی سەرانسەریی -ش لە سووریا دەکات.

 

لە راگەیێندراوەکەی کۆشکی سپیدا هاتووە: "کردارەکانی رژێمی سووریا و سیاسەتەکانی، لەنێویاندا بابەتەکانی پەیوەست بە بەکارهێنانی چەکی کیمیایی و پاڵپشتیکردنی تیرۆر بەردەوامن لەوەی هەڕەشەیەکی نایاسایی بخەنە سەر ئاسایشی نیشتمانی، سیاسەتی دەرەوە و ئابووریی ویلایەتە یەکگرتووەکانی ئەمریکا".

 

کۆشکی سپی رایگەیاندووە، بەردەوام دەبن لەوەی لە نزیکەوە چاودێریی کار و سیاسەتی حکومەتی سووریا بکەن. بەگوێرەی ئەو سیاسەتەی کە حکومەتی سووریاش دەیگرێتە بەر، بڕیار لەسەر درێژکردنەوەی باری نائاسایی دەدەن.

 

بەرپرسانی ئەمریکا رایانگەیاندووە، لەگەڵ سیاسەتەکانی حکومەتی ئێستای سووریا نین و بەردەوام دەبن لە تووندکردنی سزاکانی سەر دیمەشق، ئەوە سەرەڕای ئەوەی چەندین وڵاتی عەرەبی تاوەکو ئێستا پەیوەندییەکانیان لەگەڵ سووریا ئاسایی کردووەتەوە.

 

قەیرانی سووریا لە ساڵی 2011 دەستیپێکرد و لەو کاتەوە زیاتر لە 500 هەزار کەس گیانیان لەدەستداوە؛ قەیرانەکە بووەتە هۆی ئاوارە و دەربەدەربوونی ملیۆنان کەسی دیکە.

 

بەگوێرەی ئەمنستی ئینتەرناشناڵ، تاوەکو کۆتایی ساڵی 2022، پێنج ملیۆن و 600 هەزار هاووڵاتیی سووریایی پەنابەر بوون.