سعودیە داوا لە موسڵمانان دەکات بۆ دیاریکردنی جەژن دووشەممە چاودێریی مانگ بکەن

 

دادگەی باڵای سعودیە لە راگەیێندراوێکدا داوای لە دانیشتووانی وڵاتەکە کرد، ئەگەر مانگیان بینی، لایەنە پەیوەندیدارەکان ئاگاداربکەنەوە. 

 

هیلالی مانگی نوێ دەکرێت بە چاوی ئاسایی یان بە دووربین ببینرێت. 

 

هەرێمی کوردستان و وەقفی سوننی عێراق هاوشێوەی سعودیە و زۆربەی وڵاتانی زۆرینە موسڵمانی سوننە مەزهەبی دیکە، 11ی ئاداریان بە یەکەم رۆژی مانگی رەمەزان دانا. 

 

شيعەکانی عێراقیش هاوشێوەی ئێران رۆژێک دواتریان کردە رەمەزان. 

 

ئایینی ئیسلام ساڵنامەی هەیڤی پەیڕەو دەکات کە پێی دەگوترێت ساڵنامەی کۆچی، لە 12 مانگ پێکدێت و ساڵەکەی 354 یان 355 رۆژە. 

 

رەمەزان نۆیەم مانگی ساڵنامەی کۆچییە؛ لەدوای مانگی شەعبان و پێش مانگی شەوال دێت.