دەوامی خوێندنی باڵا (دبلۆمی باڵا، ماستەر و دکتۆرا) لە زانکۆی سلێمانی دەستپێدەکات

 

 

ئەمڕۆ شەممە 28-10-2023 ئەنجوومەنی زانکۆی سلێمانی رایگەیاند، سبەی یەکشەممە دەوامی خوێندنی باڵا (دبلۆمی باڵا، ماستەر و دکتۆرا) لە زانکۆکەیان دەستپێدەکات.

 

بەگوێرەی زانیارییەکانی رووداو، دواکەوتنی دەستپێکردنەوەی دەوامی خوێندنی باڵا لە زانکۆی سلێمانی بەهۆی دواخستنی دەوامی بەکالۆریۆس بوو؛ ئەمڕۆ لە زانکۆکە بەشە پزیشکییەکان دەوامیان کردووە و بڕیارە سبەی سەرجەم بەشەکانی دیکەی بەکالۆریۆس، ماستەر و دکتۆرا دەست بە دەوام بکەن.

 

ئەمساڵ لە زانکۆی سلێمانی 1600 کەس بۆ دبلۆمی باڵا، ماستەر و دکتۆرا دەخوێنن.

 

رۆژی 15-10-2023 وەزارەتی خوێندنی باڵا و توێژینەوەی زانستی رایگەیاند، 25ی مانگ دەوامی خوێندنی باڵا لە زانکۆکانی هەرێمی کوردستان دەستپێدەکات؛ تەنیا زانکۆی سەلاحەدین لە شاری هەولێر نەبێت، کە یەکەم زانکۆ بوو دەوامی خوێندنی باڵا تێیدا دەستیپێکرد، ئەویش رۆژی شەممە 14-10-2023یە.

 

زانکۆی سلێمانی بەهۆی دابەشنەکردنی مووچەی مامۆستایان و فەرمانبەرانی و دەرماڵەی خوێندکاران، دەستپێکردنی دەوامی بەکالۆریۆسی بۆ ئەمڕۆ شەممە دواخست.

 

جگە لە پێشکێشکارانی ناوچە جێناکۆکەکان لە زانکۆی دهۆک، ئەمساڵ 1104 کەس بۆ دبلۆمی دوو ساڵەی پزیشکی، ماستەر و دکتۆرا دەخوێنن. لە زانکۆی هەڵەبجە تەنیا ماستەر هەیە کە 60 کەس ئەمساڵ دەخوێنن.

 

رۆژی 12ی حوزەیرانی 2023 تاقیکردنەوەی توانستی زانستیی خوێندنی باڵا بۆ دیپلۆمی باڵا، ماستەر و دکتۆرا بەڕێوەچوو، کە 15 هەزار و 728 کەس داواکارییان پێشکێشکردبوو و تاقیکردنەوەکەیان کرد؛ 11 هەزار و 382یان بۆ ماستەر و دوو هەزار و 692ـیان بۆ دکتۆرا، 177یان بۆ دیپلۆمى باڵاى دوو ساڵەى پزیشکى و هەزار و 477یان بۆ دیپلۆمى باڵاى یەک ساڵەى ئەکادیمى بەشدارى تاقیکردنەوەکانیان کرد.