هێشتا 20 پاڵاوگەی نایاسایی لە دهۆک کار دەکەن

 

 

زۆرترین پاڵەوگە لە ناوچەی کواشێ لە پارێزگای دهۆکە و مەترسیی لەسەر ژینگەی پارێزگاکە دروستکردووە، زۆربەشیان دوور لە ستاندارد و کۆنترۆڵ کار دەکەن.

 

عەبدولڕەزاق خەیلانی، گوتەبێژی دەستەی پاراستن و چاککردنی ژینگەی هەرێمی کوردستان بە رووداوی راگەیاند، "حکومەتی هەرێمی کوردستان لەسەر ئاستی وەزارەتە پەیوەندیدارەکان کۆمەڵێک رێنوێنیی یەکگرتووی هەیە و دەبێت هەموو پاڵاوگەکانی نەوت خۆیان بگونجێنن لەگەڵ رێنوێنییەکانی حکومەتی هەرێمی کوردستاندا."

 

 

بەپێی بەدواداچوونی رووداو، لە ناوچەی کواشێی پارێزگای دهۆک، 57 پاڵاوگە هەن، 10 پاڵاوگە فلتەریان بەستووە و پابەندی رێنوێنییەکانن، ئێستا کار دەکەن؛ 30 پاڵاوگەیان داخراون؛ بەڵام 20 پاڵاوگەی دیکە بە نایاسایی کار دەکەن.

 

عەبدولڕەزاق خەیلانی گوتی، "هەر پاڵاوگەیەک رەزامەندیی لایەنی پەیوەندیداری نەبێت نایاساییە. بەرهەمەکانیشیان بێ کواڵێتین و دەردانەکانیان ژەهراوین."

 

 

لە هەرێمی کوردستاندا، هەر کۆمپانیایەک بیەوێت پرۆژەیەکی نیشتەجێبوون بکات، دەبێت رێژەی 25%ی رووبەری پرۆژەکەی بکاتە سەوزایی و ئەگەر لە پرۆژەکەیشیدا نەیتوانی ئەو رێژەیە بکاتە سەوزایی، ئەوا دەبێت ئەو رێژە سەوزاییە لە جێیەکی دیکە بچێنێت.

 

لەبارەی رێژەی سەوزایی لە شارەکانی هەرێمی کوردستان، بەگوێرەی ستاندارد نابێت 15% کەمتر بێت، رێژەی سەوزایی لە شارەکانی هەرێمی کوردستانیش لە سلێمانی 19% و لە هەولێر 15% و دهۆک 13%یە. واتە دهۆک لە خوار رێژەی ستانداردەوەیە.

 

 

گوتەبێژی دەستەی پاراستن و چاککردنی ژینگەی هەرێمی کوردستان دەڵێت، "پاڵاوگەکان، پێکهاتەکانی نەوتی خاو دەکەن بە نەوتی سپی، گاز و بەنزین، ئەمەش بە تێکەڵکردنی کیمیایی و کوڵاندن دەبێت یان چەند مادە و گازێکی ژەهراوی دەردەدەن، بەتایبەت نیترات، کبریت و دووەم ئۆکسیدی کاربۆن؛ کە مەترسین بۆ سەر ژینگە."

 

بەپێی بەدواداچوونی رووداو، ئەو پاڵاوگانە قەبارە بچووکن، تاوەری پاڵاوتن کە لە پاڵاوگەکاندا سەرەکین، ئەگەر باش بێت ئەوا بەرهەمەکان باش دەبن، بەڵام لێرە تاوەری تورکی، یان چینی و هیندی بەکاردێنن؛ ئەوانە نرخیان کەمە، کوالێتییان خراپە و گازی زۆر دەردەدەن.

 

لەنێو نەوتدا 37 ماددەی کیمیایی هەن کە بەهۆی باش نەپاڵاوتنییەوە نزیکەی 30 ماددەی گازی و ناگازی هەن کە نەپاڵێوراون و دەچنە نێو هەوا و هۆکاری بۆنی ناخۆش و پیسکردنی ژینگەن.